UKelehe uzimisele ngesicoco
UBHEKE ukuthola isicoco sesibili seComrades Marathon, uGift Kelehe, owayinqoba okokuqala ngo-2015 kubhekwe uMgungundlovu.
IComrades yalo nyaka, engoJuni 10, isuka eMgungundlovu iye eThekwini lapho izophelela khona eMoses Mabhida Stadium, hhayi eKingsmead Stadium njengaseminyakeni edlule.
Lokhu kusho ukuthi umjaho uzothi xaxa ngamamitha ambalwa. Usuzoba wu-90.184km esikhundleni sika-89.208 owawuyiwona kugcina ukwehliwa ngo-2016.
UKelehe (36) waqeda endaweni yesithathu nyakenye kuyiwa eMgungundlovu, elandela uHatiwande Nyamande, owaqeda endaweni yesibili noBong’musa Mthembu owadla ubhedu.
Ngo-2016 kwehilwa uKelehe, ogijimela iTom Tom, akuzange kumhabele kahle ethola isiliva engena endaweni ka-41. Indawo engcono aseke wayithola kwehliwa eyesithathu, akwenza ngo-2014.
“Wonke amalungiselelo ahamba kahle. Sizosebenzisa amasonto amabili ezayo ukupholisha izindawo ezimbalwa okusamele sizilungise. Ngizizwa ngiwumqemane. Ngingasho ukuthi ngiwubheke ngabomvu umjaho. Into engiyibhekile wukuthi ngisithole isicoco kwehliwa,” kusho uKelehe othe usenamasonto ekhempe eDullstroom, eMpumalanga.
Ngokwakhe awukho umehluko otheni phakathi kokwenyuka nokwehla emjahweni.
“Umehluko yizintaba uma kwenyukwa. Uma kwehliwa umjaho uvame ukushesha. Yingakho ngisebenza kakhulu ekulungiseni ijubane lami ikakhulukazi kumakhilomitha angasekugcineni. Kuzomele ngibeke iso kulabo esibanga nabo, ngibahlale ezithendeni. Umjaho uvame ukushesha uma sekusele amakhilomitha ayishumi okugcina,” kusho uKelehe umfowabo, u-Andrew owanqoba iComrades ngo-2001.
UKelehe ubegijima kwiTwo Oceans yalo nyaka neLoskop Marathon. Kodwa ukugcizelele ukuthi ubengabheke lutho kule mijaho. “Bengenzela ukuzihlola isimo sami. Wonke amalungiselelo ami abheke kwiComrades.”
Phakathi kwezimbangi athe uzobe ezibeke iso ubale uMthembu, uLudwick Mamabolo noCharles Tjiane.
UMamabolo, oseneminyaka engaphezulu kuka-40, wawunqoba umjaho kwehliwa ngo-2012. Nyakenye waqeda endaweni yesine kanti ngo-2016 yesibili. UTjiane usenamagolide amane eComrades ngokuqeda kwiTop 10.