Kuqopheke umlando kuqokwa uSiya Kolisi

KUQOPHEKE umlando ebholeni lombhoxo eNingizimu Afrika kuqokwa uSiya Kolisi njengokaputeni weqembu lesizwe amaBhokobhoko nokuyizindaba ezimenyezelwe yiSouth African Rugby Union ekhasini layo kwi-twitter izolo ekuseni.

UKolisi (26) uzoba ngowokuqala omnyama ukuhola iNingizimu Afrika esigabeni somhlaba kulo mdlalo ohlezi ugubezelwe yizindaba zobuhlanga.

Ngokwesimemezelo uzohola iqembu emdlalweni weTest ne-England ngoJuni. Uzakwabo kaKolisi kumaStormers uPieterSteph du Toit uzoba ngukaputeni uma sekudlalwa neWales eWashington DC ngoMgqibelo.

UKolisi uzobe engekho emdlalweni weWales. Iqembu lizobuya kuleli bese libhekana ne-England kwiCastle Lager Incoming Series. NgoJuni 9 bazodlala eGoli, ngoJuni 16 bazoqhuthana eBloemfontein bese begcina eKapa ngoJuni 23.

Lezi zinguquko ebhandeni zenzeke ngemuva kokulimala kukaWarren Whiteley no-Eben Etzebeth.

UKolisi ubuholi bakhe usebukhombisille njengoba engukaputeni weDHL Stormers.

Umqeqeshi wamaBhokobhoko uRasie Erasmus uthe wethemba ukuthi bobabili uKolisi noDu Toit bazokwenza umsebenzi oncomekayo.

“Kuyinto enkulu ukuhola amaBhokobhoko. USiya noPieterSteph bangabantu abaqotho, abaneqiniso, abasebenza kanzima futhi abahlonishwayo ngozakwabo. Ngikholwa wukuthi bobabili bazokwenza umsebenzi omuhle njengokaputeni. Ngiyakholelwa ekutheni umdlali ngamunye kumele ahole endaweni ayidlalayo, okusho ukusebenza ngokuphindiwe ukuze azuze lokho. Ukuze amaBhokobhoko abuyele empumelelweni,” kusho u-Erasmus ekhasini i-@Spingboks kwi-twitter.

Ngaphambi kokuthi u-Erasmus enze lesi simemezelo izolo, ubevele enze okungajwayelekile ngesikhathi eqoka isikwati sakhe sokuqala kusukela ethathe izintambo ku-Allister Coetzee. Ubize abadlali abangu-20 abamnyama kwabangu-43 okuyinto ebingakaze yenzeke njengoba kuhlezi kukhalwa ngempi yobuhlanga ebholeni lombhoxo kuleli.

Phakathi kwabadlali abasha abamnyama ababiziwe kukhona u-Ox Nche odlalela iCheetahs, uMakazole Mapimpi noSibusiso Nkosi beCell C Sharks u-Aphiwe Dyantyi weLions noSikhumbuzo Notshe oyibamba kwiStormers.

Iqembu lamaBhokobhoko elizobhekana neWales:

Phambili: Nizaam Carr, Dan du Preez, Pieter-Steph du Toit, Thomas du Toit, Jason Jenkins, Steven Kitshoff, Wilco Louw, Frans Malherbe, Bongi Mbonambi, Oupa Mohoje, Ox Nche, Sikhumbuzo Notshe, Marvin Orie, Chiliboy Ralepelle, Kwagga Smith, Akker van der Merwe.

Emuva: Curwin Bosch, André Esterhuizen, Warrick Gelant, Travis Ismaiel, Elton Jantjies, Jesse Kriel, Makazole Mapimpi, Embrose Papier, Ivan van Zyl, Cameron Wright.