Ithuba lokuvuna izithelo ku-Ofori
UZIZWA ekhethekile ngokubanga imiklomelo nezinsika zabadlali abadume umhlaba wonke unozinti weMaritzburg United uRichard Ofori.
Lo nozinti odabuka eGhana uzobanga umklomelo kanozinti ovelele nesilomo seKaizer Chiefs neBafana Bafana, u-Itumeleng Khune nensika yeMamelodi Sundowns neqembu lesizwe laseUganda uDennis Onyango.
Ozonqoba uzomenyezelwa namuhla ebusuku emiklomelweni yePremier Soccer League (PSL), eSandton Convention Center, eGoli.
U-Ofori uphinde waqokwa nasemiklomelweni yangakubo eGhana. Uqokelwe emklomelweni kanozinti ovelele nomdlali waseGhana oshaye into ecokeme kwabadlala kwamanye amaligi.
Kulo mklomelo uqokwe nesibabuli seSwansea City, uJordan Ayew noThomas Partey ogijima kwi-Atletico Madrid.
Exoxa neSolezwe ukusho kwagcwala umlomo ukuthi uzizwa ekhethekile ngokubanga imiklomelo nezibabuli zabadlali.
“Kuyinto enkulu ukuqokelwa emklomelweni wonozinti abenze kahle lapha eNingizimu Afrika. Ukudlala kwiPSL bese kuthi ekupheleni kwesizini ufakwe ohlwini lonozinti abashaye into ecokeme kuyakhuthaza. Ngizizwa ngikhethekile ngoba ngizobanga lo mklomelo nonozinti abahlonishwayo kuleli nasemazweni abo. Kuyisifiso sabo bonke abadlali ukuthi bathole umvuzo ngomfutho abasuke bewufaka isizini yonke,” kusho u-Ofori.
Lolu nkonko lukanozinti lusize iTeam of Choice yaqeda imidlalo engu-30 ihlezi endaweni yesibili emaqenjini angenelwe amagoli amancane kwi-Absa Premiership. Ingenelwe amagoli angu-23.
Leli qembu elizinze eMgungundlovu liphinde lafinyelela kowamanqamu weNedbank Cup lapho liguqiswe khona yiFree State Stars ngo 1-0.
“Ngifisa ukubonga uMdali ngokunginika amandla okuzuza ingxenye yezifiso zami kule sizini,” kusho u-Ofori.
Njengamanje usebheke ukuba ngunozinti ohamba phambili eqenjini lesizwe langakubo iGhana. Ukhona esikwatini esizodlala umdlalo wesihle kuleli sonto neJapan.
“Kuyiphupho labo bonke abadlali abadlala ezingeni elikhokhelayo ukumela izwe labo. Bonke abadlali bafisa ukudlalela iqembu lesizwe. Ngijabule ngokuba yingxenye yeqembu. Into osekumele ngiyenze wukubamba ithuba engilitholayo ngezandla zombili. Kumqoka ukuthi ngikhule umdlalo nomdlalo futhi ngihlale ngilambele ukufunda izinto ezintsha. Ukubizelwa kwelesizwe kuwuphawu lokukhula. Ngizimisele ngokuqhubeka nokusebenza kanzima,” kusho u-Ofori.
U-Ofori uphinde wasiza iqembu lakhe laqeda endaweni yesine kwi-log lafinyelela nakowandulela owamanqamu weMTN8.
“Konke kuhamba kahle. Kube yisizini emnandi kakhulu lena kimina. Kuyinto enkulu kakhulu ukubanga umklomelo noPartey noJordan ngoba laba ngabadlali ababili abagijima kumaligi ahlonishwayo emhlabeni,” kuphetha u-Ofori.