Bavuthela abakwaSABC abalandeli bakamaskandi
BATHUKUTHELE bayaveva abalandeli bomculo kamaskandi ngeSABC abayisola ngokukhetha iphela emasini, ngokungazidlali izikhangiso ezinhlelweni zethelevishini, zokushona kwesihlabani somculi kamaskandi uMjik’jelwa ‘Ichalaha LikaShafuza’ Ngubane.
Abalandeli bakamaskandi bakhala ngokubukelwa phansi komculo kamaskandi yiSABC ngokungavezi izikhangiso nomngcwabo kaMjik’jelwa ekubeni le nhlangano ihlale iyiveza eminye imingcwabo.
Nomsakazi woKhozi FM, uNgizwe ‘Zulu Charmer’ Mchunu nozakwabo uZimiphi ‘Zimdollar’ Biyela nabo abasalanga ngaphandle ngesikhathi behlonipha lo mculi ohlelweni, uSigiya Ngengoma ngoMgqibelo owedlule. Iningi lalaba balandeli likhale ngokuthi iSABC ikhetha iphela emasini ngoba yawuveza umngcwabo womethuli wezinhlelo u-Akhumzi Jezile nesihlabani somculo wokholo uSifiso Ncwane.
Laba balandeli baze bathumelela le nhlangano incwadi yezikhalazo. “Ngiyazi ukuthi uthola inqwaba yamaemail kodwa ngiyethemba uzoba nesikhathi sokufunda i-email yami. Muva sisanda kushiywa iqhawe emculweni kamaskandi, uSibongiseni Ngubane owaziwa ngoMjik’jelwa (Sengathi umphefumulo wakhe ungalala ngokuthula). Lolu hlobo lo mculo lungelunye lwezinhlobo ezisekelwa kakhulu eNingizimu Afrika, ikakhulukazi ngamaZulu namaXhosa.
Lo mculo uhlanganise izizwe ezihlukahlukene ezifundazweni zakuleli,” kusho lesi tatimende esithunyelwe ngumculi kamaskandi obizwa ngoMaguzu.
Siqhuba lesi sitatimende sithe, lo mculo udlala enkulu indima ekufukuleni umnotho wakuleli. Sichaze uMjik’jelwa njengenye yezingqalabutho zomculo futhi ezinamagalelo emculweni wakuleli.
Eziphendulela okhulumela iSABC uKaizer Kganyago unxuse abathandi bomculo kamaskandi ukuba bahlele umhlangano nezikhulu zale nhlangano ukuze bazichazele ukuthi lowo mculi ongasekho ubenamaphi amagalelo.
“Abantu bashona nsuku zonke, kusho ukuthi uma singabungaza nanoma wubani, singahlala sikhipha izikhangiso zabashonile zinsuku zonke,” kusho uKganyago.