Izingwazi zaphesheya ziza kuleli
BAZOHLEKA bodwa abathandi beR&B yakudala njengoba iNingizimu Afrika izovakashelwa ngabaculi bamzukwana abazoba namakhonsathi emadolobheni amakhulu akuleli ngoSepthemba.
Amaqembu azotheleka kuleli ezonandisa emcimbini ohlelwe yiGlen 21 Entertainment, iSoul Fest 2018, yiTLC, SWV (Sisters With Voice) neDru Hill.
EGoli bazonandisa eTicketpro ngoSepthemba 1, eThekwini babe seJonsson Kings Park ngoSepthemba 2 bese umjikelezo bewuphetha eGrand West Arena, eKapa ngoSepthemba 4.
Esitatimendeni uRaquel Abrahams weGlen 21 Entertainment, uthe inhloso yomcimbi ukukhumbuza abantu umculo wamzukwana. “Uhlu kwabaculi luzokwenza wonke umthandi weR&B ukuthi ame ngezinyawo acule zonke izinhlamvu zengoma. Kuzoba wumcimbi wokukhumbuza abantu kudala okungamele ubaphuthe,” kusho isitatimende.
I-TLC yiqembu elabunjwa nguTionne “T-Boz” WAtkings, Lisa “Left Eye” Lopes (ongasekho) noRazonda “Chilli” Tomas. Bashaya izingoma ezaduma okubalwa kuzo iWaterfalls, No scrubs, Unpretty nezinye. Sebake bahlomula ngenqwaba yezindondo ezihlanganisa ezamaGrammy ezine.
KwiSoul Fest kuzonandisa uT-Boz noChilli. I-SWV yona ibunjwe nguCheryl “Coko” Gamble, Tamara “Taj” Johnson noLeanne “Lelee” Lyons. Idume ngezingoma okubalwa kuzo iWeak nezinye. IDru Hill ihlanganiswe nguMark “Sisqó” Andrews, Tamir “Nokio” Ruffin and, Larry “Jazz” Anthony, noJames “Woody Rock” Green.
Baziwa ngezingoma ezithi In My Bed, Never Make a Promise nezinye.
Amathikithi atholakala eTicketpro ngemali eqala kuR490.
- Intatheli yeSolezwe