Kuphenywa iphoyisa elidubule umlisa eSikhaleni

BAFUNA liboshwe iphoyisa abathi livulele ngenhlamvu labulala owesilisa emotweni yakhe, ngaphandle kwesizathu eSikhaleni ngempelasonto.

UMnuz Sabelo Nsele (37) (osesithombeni) udutshulwe amahlandla amabili ehamba ngemoto yakhe i-Golf 7, washonela khona lapho.

Ngokusho kukamfowabo uMnuz Vusi Ntuli, bezwe ngemoto ikhalakathela sengathi iyaphaphalaza.

Uthe baphumile beyobheka ukuthi kwenzekani nokuyilapho bezwe amaphoyisa ehilizisana nomufi kwabe sekuqhuma isibhamu kabili. “Umqasho esihlala kuwona useduze nomgwaqo, sithe uma sizwa umsindo wemoto ngaphandle saphuma. Amaphoyisa amabili aqonde kuyena, sezwa kunokuhilizisana esingazi kuqalwe yini. Elilodwa iphoyisa libe selidubula,” kusho uNtuli. Uthe umfowabo ubephuma endaweni yokucima ukoma ehamba nowesifazane. “Umfowethu ubezikhiphile kwazise bekuwusuku lwakhe lokuzalwa futhi eholile,” kusho uNtuli.

Omunye umthombo weSolezwe ocele ukungadalulwa uthe: “Sizwe elinye iphoyisa libuza ukuthi umshayelani ngoba ngathi uphuzile lo muntu. Kuthe kusenjalo esakhuzana wodwa amaphoyisa kwaqhuma isibhamu. Elinye iphoyisa beliqhubeka likhuza lithi umdubulelani umuntu ngoba uziphuzele, ngcono simbophe,” kusho umthombo.

Okhulumela amaphoyisa KwaZulu-Natal uCaptain Nqobile Gwala usiqinisekisile isehlo. Idokodo ngaleli cala selidluliselwe kwabeIndependent Police Investigative Directorate, abaphenya ngokuziphatha kwamaphoyisa.