Ihlehlisiwe futhi ingqungquthela ye-ANC eKZN
IPHINDE yahlehliswa ingqungquthela ye-ANC KwaZuluNatal ebhekwe ngabomvu obekulindeleke ukuthi ihlale kule mpelasonto esiya kuyona.
Esithangamini nabezindaba eLuthuli House izolo, uNobhalajikelele we-ANC uMnuz Ace Magashule, umemezele ukuthi ingqungquthela yesifundazwe ngeke isaba kule mpelasonto.
“Ingqungquthela ye-ANC esifundazweni saKwaZulu-Natal obekulindeleke ibe kule mpelasonto ngeke isaba khona sisazomemezela ukuthi izoba nini,” kusho uMagashule.
Uthe ubuholi bukazwelonke buthathe isinqumo sokuthi buyihlehlise ingqungquthela ngoba busafuna ukuxoxa namagatsha enhlangano esifundazweni.
“Kunezikhalo ezikhona ezivela emagatsheni esifuna ukuzixazulula ngaphambi kokuthi siye engqungqutheleni,” kusho uMagashule.
Uthe abafuni ukujaha ukuya engqungqutheleni kusekhona okumele kulungiswe.
“Amalungu esigungu esiphezulu enhlangano eholwa yiPhini likaNobhala-jikelele azohambela amagatsha enhlangano eKZN eyozwa izikhalo zamalungu ngenhloso yokuthola ikhambi ezinkingeni ezikhona,” kusho uMagashule.
Uthe ingqungquthela yaKwaZuluNatal izoqhubeka uma sekuxazululwe izikhalo ezikhona.
“Izifunda eziyisishiyagalombili kwezingu-11, zisesimeni esikahle, zintathu kuphela izifunda ezingakayi engqungqutheleni okuyiMoses Mabhida, Harry Gwala neLower South Coast, iTheku lona isikhathi sehhovisi sokuhola isifunda sona sizophela ngonyaka ozayo,” kusho uMagashule.
Uthe banqume ukuthi ingqungquthela yesifundazwe kube ngeyamagatsha hhayi izifunda.
“Amalungu azoya engqungqutheleni ngokwamagatsha hhayi ngokwezifunda lokho okusho ukuthi ngisho noma ngabe kuthiwa lezi zifunda ezintathu zigcina zingayanga ezingqungqutheleni zazo, kodwa amagatsha azokwazi ukubamba iqhaza engqungqutheleni yesifundazwe,” kusho uMagashule.
Uncome umsebenzi wesigungu sesikhashana senhlangano eKZN esiholwa uMnuz Sihle Zikalala noMnuz Mike Mabuyakhulu wathi senze umsebenzi omuhle ukuzama ukubumba amalungu enhlangano esifundazweni.
Uthe umhlangano wesigungu esiphezulu uphinde wayixoxa kabanzi indaba yokubulawa kosopolitiki eKZN.
“Silubhekile udaba lokubulawa kosopolitiki eKZN, sabheka nokuthi noma kuthiwa ukubulalana kwenzeka ngaphakathi enhlanganweni sathi inhlangano kumele ilusukumele kuthi labo abathintekayo baxoshwe ngisho enhlanganweni,” kusho uMagashule.
I-ANC eKZN ibihlukene phakathi ngodaba lokuhlala kwengqungquthela kukhona amalungu athi ayihlale amanye ethi ayingahlali. Lo mdonsiswano uholele ekutheni amalungu abhekane ngeziqu zamehlo.