Izifundo ezizosiza abafundi kumatric nonyaka
KULINDELEKE ukuthi sikhule isibalo sabafundi abaphasa ngo-bachelor kwabazobhala umatric nonyaka emuva kokufakwa kwezifundo ezintsha ezizobalekelela kulokhu.
Ibachelor ivumela umfundi ukuthi angene enyuvesi, ngediploma ukwazi ukungena ema-University of Technology kuthi ihigher certificate imvumela ukuthi angene emakolishi amakhono.
UDkt Barney Mthembu, isikhulu esiphethe izivivinyo emnyangweni wezemfundo KwaZulu-Natal, nonyaka kwengezwe ezinye izifundo ezisosiza ukuthi abafundi baphase ngama-bachelor.
Uthe phambilini umfundi ubengaphasa ngamalengiso izifundo ezifana neMusic, Engineering Graphic Design, Computer Application Technology, Tourism nezinye kodwa zingamsizi ngokuthi athole ibachelor.
“Izifundo obukwazi ukuthi uthole ibachelor uma uziphase kahle ilezi ezijwayelekile, iMaths, Sayensi, Maths Literacy, History, Economics, Accounting, izilimi, Business Studies, Geography neLife Sciences. Yingakho bezokwanda abafundi abazothola ama-bachelor ukuze bangene enyuvesi ngokohlelo olusha lwezifundo ebezingekho,” kusho uMthembu.
Kubafundi abawu-147 648 ababhala umatric ngo-2016 bawu36 139 abaphasa ngama-bachelor (24%). Nyakenye sanyuka isibalo sama-bachelor ngoba kubafundi abawu-127 317 ababhala umatric baba wu-35 687 abaphasa ngamabachelor (28%).
Uthe nonyaka kunabafundi abazobhala okokuqala iTechnical Maths neTechnical Science.
“Abafundi baqala ukuthatha lezi zifundo kwaGrade 10. Kulo nyaka bazobe bezibhala okokuqala ngoba kugqugquzelwa ukuthi kube nalabo abenza izifundo zamakhono.”
Uthe inselelo enkulu wukuthi umnyango awunabo abaluleki balezi zifundo.
“Sinabo othisha abazifundisayo izifundo ezintsha. I-Technical Maths kayifani neMaths neMaths Literacy ejwayelekile. Ihluke kakhulu, yingakho umfundi engeke nje esakwazi ukuthi amane afune ukushintsha uma efunda umatrick acabange ukuthi angayenza engazange asikhethe kwaGrade 10.”
UMthembu uthe kunabafundi abazobhala okokuqala nge-Sign Language kwamatric.
Uqhube wathi kwiHistory kufakwe nomlando waseChina nowaseCuba, into ebingafundwa kuqala.