Ubulawe esesitobhini eya emsebenzini
UZIZWA ungaphephile umphakathi waseMlaza kwa-V emuva kokubulawa kowesifazane obesesitobhini elinde ukuya emsebenzini ngabasolwa abebephuma ethaveni eseduze.
UNksz Hlengiwe “Hle” Mchunu (23) obenenyanga eqalile emsebenzini ubulawe umsolwa ongaziwa, omlandele ephuma ethaveni ukuyothenga i-airtime, wamgwaza kanye esifubeni ngasesontweni lasemaRomeni i-Our Lady of Grace (Parish), ngoMgqibelo.
Omakhelwane nomphakathi wakule ndawo abakhulume neSolezwe abangathandanga ukudalulwa baveze ukuthi kubashaqile okwenzekile futhi bazizwa bengaphephile emuva kwalesi sigameko.
Umufi kuthiwa kade esendleleni eya emsebenzini eJacobs, ube esedinga i-airtime wangena ethaveni engasendleleni eya esitobhini, wayoyithenga.
Isolezwe lithole ukuthi ngesikhathi esephuma kule thaveni umsolwa umvimbezele, maqede bahilizisana. Lo wesifazane ugcine ephulukundlelile wahamba, esengasesitobhini, umsolwa nomunye umngani wakhe kuthiwa baphinde baqonda kumufi. Ozibonele isigameko ongathandanga ukudalulwa uthe ubungeke uzitshele ukuthi abasolwa bazobulala umufi.
“Kwakungo-5:30 ekuseni, umufi eya emsebenzini. Ngenxa yokuthi ezinye izitolo zisuke zisavaliwe, ethaveni kuvulwa amahora angu-24 ngempelasonto, wangena yedwa eyothenga i-airtime. Abesilisa abebesethaveni bamlandela, sasingazitsheli ukuthi bengamgwaza bambulale. Sabe sesibuyela ethaveni sacela abebeziphuzela ukuba bamphuthumise esibhedlela, ushone engena khona,” kusho ozibonele.
Okhulumela amaphoyisa KwaZulu-Natal, uCaptain Nqobile Gwala, uthe kuvulwe icala lokubulala, umsolwa uyathungathwa.
Izolo Isolezwe kade lihambele le thaveni (Club Inn) abasebenzi bakhona bathe bazwile ngesigameko kodwa asenzekanga kule ndawo ngoba kuphephile futhi kunamakhamera abheke konke.
Unina kamufi, uNksz Danisile Mchunu, uthe okumdumaza kakhulu ukuthi ubesebheke indodakazi yakhe njengoba yena esephila ngokugula. “UHlengiwe ubenenyanga ethole leli toho emuva kokuhlala ekhaya esikhathi eside. Bengibheke yena ukuthi uzongisiza ngoba sengiphile ngokugula, angikwazi nokuhamba kahle.”Uthe indodakazi yakhe wayigcina iphume endlini ekuseni iya emsebenzini.
“Kwafika omakhelwane bathi indodakazi igwaziwe emgwaqweni. Ngathi ngifika emgwaqweni sekukhona imoto emhambise esibhedlela. Ngalandela ngaya esibhedlela, ngafika eseshonile. Kubuhlungu ngoba ingane yami ibiziyela emsebenzini.”