Atholakele amathambo ‘ezithandani’ ebezinyamalele
UMNDENI wowesilisa waseMpendle owanyamalala ngoDisemba evakashele intombi yakhe eThekwini, usuzokwazi ukuqhubeka nemicimbi ebimisiwe njengoba kutholakale amathambo okusolwa ukuthi ngawakhe nentombi.
Bese kumiswe yonke imicimbi emndenini kaMnuz Langelihle Mazeka (41) owanyamalala ngoDisemba 13 eyohlangabeza uNksz Nozipho Mnguni (27) ayemvakashele eMpola, eMariannhill. Kuthiwa uNksz Mnguni owaseGreywtown kodwa obeqashe eMariannhill, ubephuma sekuhlwile emsebenzini bese isoka lakhe liyamhlangabeza.
NgoMsombuluko kutholakale amathambo ngalapho okwanyamalala khona lezi zithandani, imindeni esola ukuthi ngawazo.
UMnuz Phelelani Mazeka ongumfowabo kaMazeka, uthe amathambo atholwe ngumuntu obemba imithi yesintu ehlathini. Indawo okutholakale kuyo amathambo iseduze komfula uMhlathuzana.
“Umuntu othole amathambo ubikele amaphoyisa, kwathintwa nathi. Bese kuhlwile ngesikhathi kutholakala amathambo, amaphoyisa abuyela endaweni yesigameko izolo (ngoLwesibili).
“Sikholwa ukuthi yiwona amathambo kamfowethu nentombi yakhe ngoba sithole nesikibha sebhola ayesigqokile, nejakhethi yedansane,” echaza.
Uthe yize bese kudlule izinyanga eziningi engatholakali umfowabo, impilo ibingaqhubeki emndenini.
Uveze ukuthi bagcine bezikhulula izihlobo ukuze ziqhubeke nemicimbi kodwa bona bebesafana nabazilile ngoba bebemise yonke into.
Ngisho uKhisimusi awuzange ube mnandi kule mindeni ngoba amalunga ayo anyamalala sekusondele wona.
“Kubuhlungu kodwa sesibonga ukuthi kube khona okulandelekayo. Okubi nje ukuthi amathambo atholakale esehlangene, esicabanga ukuthi babulawa izidumbu zabo zakhwezwa phezu kwesinye. Kungenzeka kudingeke bangcwatshwe ndawonye ngendella engibone isimo siyiyona kodwa sizokhuluma nomndeni wentombi,” kusho yena.
Uthe amaphoyisa athe kuzothatha amasonto amane ngaphambi kokuthi bangcwabe ngoba kudingeka benze nolibofuzo.
Ngokwesitatimende esithunyelwe amaphoyisa aseKZN, amathambo atholakale ngezithuba zabo 6 ntambama. Amaphoyisa athe yize imindeni ikholwa ukuthi yizidumbu zabalahlekile, kudingeka kuqinisekiswe ngokwenza ulibofuzo.
Kuthiwa uMazeka wayemhlangabeza njalo uNksz Mnguni kodwa ngosuku abanyamalala ngalo ababuyanga. Kuthiwa wayeshiye iselula yakhe nasendlini kukhanysiwe. Udadewabo kaNksz Mnguni, uNksz Lindiwe Mnguni, uthe ubikelwe amaphoyisa ukuthi kutholakala amathambo, abazoyozibonela wona namuhla.
Uthe ngesikhathi kusanda kunyamalala udadewabo wayecabanga ukuthi ungcebeleke nesoka ngoba nezingane zakhe ezimbili wazishiya kuyena.