Okuphakanyiswa yi-ANC ngebhange loMbuso
I-ANC isiyalele ikomiti elibhekele izinguquko kwezomnotho ukuthi liqale uhlelo lokuthi kufakwe iBhange loMbuso, iSouth African Reserve Bank (SARB), ngaphansi kombuso.
Ingqungquthela yangoDisemba ye-ANC eNasrec eGoli yanquma ukuthi ibhange lifakwe ngaphansi kokulawulwa nguMbuso.
UNobhala-jikelele we-ANC uMnuz Ace Magashule uthe odabeni lokufakwa kwebhange ngaphansi koMbuso bazolandela umhlahlandlela ofanayo nalo osetshenziswa manje wokubuyiswa komhlaba ngaphandle kwesinxephezelo.
Uthe bazoxoxa nezinhlaka ezithintekayo kulolu daba.
“Uma ubheka emazweni amaningi ibhange lombuso lingaphansi kombuso. Sizobheka izindlela zokuqinisekisa ukuthi lesi sinqumo sengqungquthela siba yimpumelelo,” kusho uMagashule.
Ukusho lokhu izolo ekhuluma nabezindaba ngemuva komhlangano wezinsuku ezintathu wesigungu esiphezulu.
Uthe abakabeki sikhathi sokuthi lokhu kwenzeke ngoba bafuna ukuzanelisa bakhulume nazo zonke izinhlaka ezithintekayo odabeni lwebhange.
Ephawula ngokubulawa kosopolitiki ikakhulu KwaZulu-Natal uthe kusuke kulandelwa abantu abathile kulokhu kubulala.
“Kusuke kuqondiswe kwabathile. Abomthetho ababophe abenzi bobubi. Asingabazi kuthi kuthinteka abantu bangaphakathi enhlanganweni endabeni yokubulawa kwabantu, lowo muntu uyokhonjwa indlela enhlanganweni,” kusho uMagashule. Uthe akuwona umsebenzi kaNgqongqoshe wezamaPhoyisa uMnuz Bheki Cele kuphela ukulwa nalesi sihlava wathi ukuvikelwa kwamakhansela yinto okumele ibhungwe ezingeni likahulumeni.
Odabeni lwaseNorth West lokuqoka uNdunankulu omusha uthe basazobhunga ngamagama alethwe yisigungu sesifundazwe iNorth West.