Izochazwa emakhosini eyomhlaba
IPHINI likaMengameli wezwe uMnuz David Mabuza lithe kuzobizwa umhlangano ophuthumayo namakhosi ukuze kuxoxwe ngendaba yokudliwa komhlaba ngaphandle kwesinxephezelo.
UMabuza, obephendula imibuzo ePhalamende izolo, uthe abafuni ukuphambana namakhosi kodwa kumele bazwane kule ndlela esazohanjwa yomhlaba.
“Sizobiza lo mhlangano sixoxe ngale ndaba kanye nezinye ezithinta umhlaba. Ngangishilo ngihlangana neSilo samaBandla ukuthi cha njengeSilo ngizofika esigodlweni saso ngizoxoxisana naso ngalolu daba. Sizoyichaza yonke into ezokwenzeka, nalesi siphakamiso sokuthi nichibiyele umthethosisekelo sizoyixoxa nawo amakhosi ukuze siwazise ngendlela esizimisele ukuyihamba sizwane,” kusho uMabuza.
Uthe bafuna abantu abahlala emhlabeni wamakhosi babe nobunikazi bakwazi ukusebenza umhlaba.
Uthe bafuna ukubuyisela umhlaba kubantu abaphucwa wona wathi lokhu kuzokwenzeka.
“Kuzokwenzeka nonke nizobe nikhona. Kodwa lokhu sizokwenza ngendlela yokuthi kungaphazamiseki ukukhiqizwa kokudla,” kusho uMabuza.
USolwazi Nhlanhla Khubisa we-NFP uthe amakhosi ayakhala ngokuthi ashiywa ngaphandle ohlelweni lwezigcawu lwethimba elahlanganiswa nguMengameli Cyril Ramaphosa ukubheka indaba yokubuyiswa komhlaba elaliholwa ngowayenguMengameli uMnuz Kgalema Motlanthe.
UKhubisa uthe amakhosi akhala ngokuthi lezi zigcawu, zenzelwa emadolobheni kanti amanye athi ayefunda ngazo emaphephandabeni.
Uthe abiza isithangami ekhala ngokuthi sekuze kwakhishwa nombiko ekubeni wona engakaze athintwe.
Usho lokhu nje iSilo sixwayise uhulumeni ngokuthi kuyochitheka gula uma uhulumeni efuna ukuthatha umhlaba waso ngenkani.
Namakhosi kulesi sifundazwe axwayise ngokuthi kuzoshuba uma kungukuthi kuyaqhubeka ukuthathwa komhlaba weNgonyama.
Kwenzeka lokhu nje kulindeleke ukuthi ziqale izigcawu zokuhambela umphakathi ngodaba lokuthi kuchitshiyelwe isigatsha somthethosisekelo ukuze kubhekwane nendaba yokudliwa komhlaba ngaphandle kwesinxephezelo.
Leli komiti lasePhalamende lizohambela izifundazwe kusuka ngenyanga ezayo kanti lizoza kulesi sifundazwe ngoJulayi.
Esithangamini sabezindaba se-ANC uNobhala jikelele uMnuz Ace Magashule uthe bayaqhubeka nohlelo lokudla umhlaba wathi kunohlelo abazosebenza ngalo njengoba behlabela phambili nalokhu.
UMagashule uthe isigungu esiphezulu se-ANC sinxuse abantu ukuthi babambe iqhaza uma sekunezigcawu ngendaba yokuchitshiyelwa komthethosisekelo ukuze kubhekwane nokudliwa komhlaba.
“Isigungu se-ANC siyalele uRamaphosa ukuthi aqoke ikomiti longoti odabeni lokubuyiswa komhlaba. Sinxusa omasipala ukuthi banike abantu abafuna ukwakha iziza ukuze kusheshiwe eyokubuyiswa komhlaba.”