OweHighway uzoshayela i-#Sekwanele
ISILOMO somsakazi weHighway Radio, uMfundisi Dennis Nzonzo Ntombela, yiso esizoshayela uhlelo lomkhuleko weSolezwe ozoba kusasa eThekwini Community Church, enkabeni yeTheku kusasa ekuseni.
Isolezwe lihlele lo mkhuleko ngaphansi kwesiqubulo esithi #Sekwanele lapho lilwisana khona nezigameko zokuhlukunyezwa kwabantu besifazane.
Umkhuleko ngowokucela kuSomandla ukuthi lesi sihlava siphele.
Osophikweni lwezokhangisa kwiSolezwe, uNksz Phumi Mkhize, uthe uhlelo luzobe luphethwe nguNzonzo wodumo lwamatemu athi “wo hhe wo hha”.
“Yonke into isimi ngomumo futhi sinethemba lokuthi abantu bazophuma ngobuningi babo ngoba le nto ithinta wonke umuntu,” kusho uNksz Mkhize.
Uqhube wathi: “Selichitheke kakhulu igazi ngakho kumele sikhale eNkosini ukuze lokhu kuphele ngoba akukuhle. Kumele sonke sisho ngazwi linye sithi #Sekwanele ngoba siyadingana. Namuhla kungami kanti kusasa kungaba ngawe, yingakho kumele sibambisane.”
Uthe umkhuleko uzobe uhambisana nomculo wendumiso
“Siyacela ukuthi abantu bagcine isikhathi ukuze yonke into yenzeke kahle. Wonke umuntu wamukelekile ngisho ngabe ukhonza kuphi futhi nabantu besilisa kumele bafike nabo ngoba bamukelekile,” kuchaza uNksz Mkhize.
Uthe inkonzo izoqala ngo-10 ekuseni kanti kungenwa mahhala.
Ngaphansi kwe #Sekwanele izimbongi, uSiyabonga Mpungose noSbo Da Poet zihlanganise izinkondlo ngokwahlukana lapho zikhuza khona ngalesi sihlava.