Iziqu kothisha abafundisa ezinkulisa
INGANE eqale ukufunda enkulisa kulula ukuthi uma isifike esikoleni ingahluphi ngokukhala ngosuku lokuqala isesikoleni.
Lokhu kushiwo uNkk Beatrice Mqadi ongumsunguli wenkulisa iSiyaqhubeka aphinde afundise kuyo obethola iziqu zakhe zeNQF Level 4 esikhungweni esiqeqesha othisha basezinkulisa, iTree Training and Resources in Early Education, eThekwini, izolo.
UNkk Mqadi ubekothisha basezinkulisa abangu-82 abebethola iziqu zabo.
Uthe othisha abafundisa abafundi abadlule ezinkulisa babatshela ukuthi uma ingane iqale enkulisa kuba lula ukuthi ifunde ngosuku lokuqala esikoleni ngoba isuke seyizazi ezinye izinto ezenziwa esikoleni. UNkk Zelda Schwalbach wakwaSappi uthe inkampani yakhe ixhase othisha abangu-20 abebethola iziqu zabo izolo. “Sikholwa wukuthi ukufunda kuqala enkulisa yingakho sathatha isinqumo sokuthi sixhase othisha basezinkulisa sivimba ukuthi inkulisa ithathwe njengendawo yokudlala, ukudla nokulala kodwa zibe yindawo yokufunda inhlanzeko, ukubala nezinye izinto ezisiza ngokuthi ingane ikhule kahle. Phambilini besixhasa abafundi abenza amabanga aphezulu kodwa sithe uma sivakashela izinkulisa eziseduze kwezindawo esitshala kuzo amahlathi sabona ukuthi izinkulisa zasemakhaya zisadinga ukuthuthukiswa ukuze zikwazi ukuqaqa ingqondo yomfundi. Lokho kuqala ngokuthi uthisha abe nolwazi oluyilo,” kusho yena.
UNkk Susanne Ramsunder wakwaTree uthe lesi sikhungo sicija othisha ngolwazi ukuze bakwazi ukuthuthukisa abafundi siphinde sibasize ngezinsiza zokwenza umsebenzi wabo ngempumelelo.