IYiboni iyazenzela kuma-Olympiad
WAFUNDA esikoleni asebambe kuso isikhundla, uthishanhloko wesikole samabanga aphansi KwaMakhutha, esidume ngokuthi siyacoboshisa emncintiswaneni wama-Olympiad.
UNkk Nosipho Msomi onguthishanhloko obambile eYiboni Primary, uthe kuyamjabulisa ukuphatha isikole asebona olukhulu ushintsho kusona kusukela ngezikhathi zakhe. Sasigcina kuGrade 2 lesi sikole ngesikhathi uNkk Msomi efunda kuso, kanti manje sesigcina kwaGrade 7. Bekulokhu kwengezwa kancane kancane amabanga.
UGrade 7 wokuqala ophume eYiboni wenza uGrade 10 ezikoleni zamabanga aphezulu manje. Ngaphandle kokuhehwa wumfaniswano walesi sikole okuyiziketi eziluhlaza namahembe amhlophe, uma uvakashe kuso uthathwa nayindlela umculo osezingeni eliphezulu ngayo.
Othisha bakhona bavele bafane nezingane uma sekuculwa, behlanganyela ekwayeni yesikole. Isolezwe livakashele lesi sikole emasontweni edlule, sinikelelwa ikilasi negumbi lothisha ngabakwaTransnet. Ikwaya yesikole ebilekelelwa ngothisha, icule kwaze kwaphela umcimbi, ishintsha izinhlamvu zamaculo aziwayo iwenza awokubonga enkampanini.
“Ngisafunda eYiboni, sasidume ngokubhimba. Bekuthi uma sithandaza ekuseni, omakhelwane basihleke. Ngiyamangala indlela umculo osusezingeni eliphezulu ngayo, nakothisha usegazini,” kusho uNkk Msomi.
Uthe wajoyina iYiboni enguthisha ngo-1999. Isikole sakhiwa ngabo 1970. Echaza ngoshintsho, uthe kwakuqala imfundo ye-Outcome Based Education (OBE) ngesikhathi efika kulesi sikole.
“Ushintsho lwenzeke phambi kwami, kwanyuka imiphumela kubafundi. Ngafika ezinye izingane zihluleka ngisho ukubhala isiZulu, ukuqeqeshwa kothisha nge-OBE kwawenza kakhulu umehluko. Namanje sisayibambe ekutheni lenyuke izinga lokufunda ukuze nemiphumela igculise. Siqinisekisa ukuthi sikhiqiza abafundi abasezingeni eliphakeme, bafane nezinye izikole ezixube izinhlanga,” echaza.
Abakwenza ukuthuthukisa imiphumela, ukuyicubungula njalo uma kade kubhalwa izivivinyo. Lokhu kusiza ekutheni babone lapho kumele baqinise khona. Umgomo wesikole ukuthi abafundi nothisha babe sebehleli emakilasini bonke ngo-7 ekuseni.
Lesi sikole sidume ngokuba nabafundi abaqwaqwada abanye emakhanda emncintiswaneni wamaOlympiad lapho kuncintiswana ngeMaths, Natural Science neTechnology. UNkk Msomi uthe ngisho bengamenywanga emincintiswaneni bayazingenela.
Ngonyaka odlule umfundi osekwaGrade 4, uMukelani Buthelezi waphuma phambili emcintiswaneni weMaths Olympiad. Abanye abafundi asebewine kulo mncintiswano sebekwezinye izikole zamabanga aphezulu okubalwa u-Ayanda Zulu osefunda uGrade 10 e-Adams College. Kuthiwa ubephuma phambili njalo ngonyaka kwiMaths, wenza okufanayo esekwaGrade 8. Ngo-Agasti abafundi bakwaGrade 6 no-7 bazobuyela kulo mncintiswano.
Uthe izingane bazifundisa ngokufana kodwa lezi ababona ziphasa kakhulu ezifundweni ezithize, bazinika umsebenzi omningi baziqeqeshe. Uveza nokuthi zinikezwa izincwadi zebanga elilandelayo ukuze ziqeqesheke. Uma sekusondele umncintiswano othisha bazinika isikhathi esengeziwe ukucija abazongenela.
Akukona ezifundweni kuphela lapho behlabana khona kodwa ugile izimanga umfundi obenza uGrade R ngonyaka odlule, uPhumelele Dube.
Lo mfundi osekwaGrade 1 uwine emncintiswaneni wamaciko namasiko ngokuhaya inkondlo. Ngesikhathi kunomcimbi wokunikelelwa ngekilasi, abanye abafundi bebeveza abakufunda kwiNatural Science kodwa bekusho sankondlo.
UNkk Msomi uthe ngisho emakilasini bafundisa kanjalo ukuze izingane zikujabulele ukufunda, kube lula nokukhumbula ezikufundile.
UNkk Msomi uqale ngale nyanga ukubamba isikhundla sikathishanhloko emuva kokuba uMnuz Mduduzi Kheswa enyuselwe kwesokuba umhloli wesekethe.
Uthe umcije kokuningi, afuna ukuqhubeka kukona. Isifiso sakhe ukuthi basuke esibalweni sabafundi abangu-960 bafinyelele ku-1 000. Uthe ubona ngokwanda kwesibalo sabafundi ukuthi isikole senza kahle.
UKheswa utshele Isolezwe ukuthi amagalelo akhe aseYiboni amenze waqokelwa esikhundleni esisha. Uncome ukuzimisela kothisha balesi sikole, athe kwenza ukuthi umsebenzi ube lula nakuthishanhloko.
IYiboni Primary inothisha abangu-28 kanti isesigabeni sikaQuintal 4 ngokokukleliswa kwezikole. Abafundi bayakhokha kodwa labo abantulayo benzelwa uhlelo lukashwele, bafunde mahhala. Isikole sakhiwe emphakathini onabazali abaningi abangasebenzi.
Lokhu kwenza ukuthi izingane zingakwazi ukuthengelwa zonke izidingo zesikole . Othisha kuye kudingeke bazithengele izincwadi izingane eziswele, baphinde bazikhavele. Phezu kokuvelela ezifundweni kodwa isikole sishoda ngomtapo wolwazi, okuthiwa abafundi bathembela kweyomphakathi eqhelile esikoleni.