Bahlonyiswe ngokwakha ithuluzi eliwusizo
SEBEPHENDUKE osomabhizinisi abantu baseBabanango abahlomule ngokufundiswa amakhono okwakha ithuluzi lokukhanyisa elisebenzisa ugesi welanga, elaziwa nge-Ukukhanya device, ngempelasonto.
Umphakathi wasemapulazini ohlala ku-ward 9 ufakelwe ugesi welanga yizitshudeni zaseMangosuthu University of Technology (MUT), ezisohlelweni lwalesi sikhungo olusiza imiphakathi ngamakhono amabhizinisi ezibizwa nge-Enactus.
UMfundo Mpulo, umengameli walolu hlelo kulesi sikhungo, uthe inhlangano engenzi nzuzo, i-Uluma Entrepreneurship Community Empowerment esebenza kule ndawo ibabikele ngesimo somphakathi waKwaCokolo okumele uye emadolobheni uma ufuna ukucharger amaselula.
“Ngokolwazi esilutholile izikole zakule ndawo zamabanga aphezulu zinawo ugesi kodwa emakhaya awukho. Abafundi uma befuna ukubuyekeza umsebenzi wesikole kumele baphindele esikoleni okuvame ukuthi siqhele emizini yabantu ngamakhilomitha ayisikhombisa kuya phezulu,” kusho yena.
Uthe kubafundi abaningi kuba nzima ukuya esikoleni beyobuyekeza umsebenzi. Bagcina befunda ngamakhandlela emakhaya.
Uqhube wathi emakhaya antulayo ngezinye izinsuku awabikhona amakhandlela enele. Ngokuthola kwabo abafundi abaphuma kulawo makhaya bayafeyila.
Uqhube wathi abagcinanga ngalokho ngoba bafundise intsha yakule ndawo ehleli emakhaya ukuthi Ukukhanya device yakhiwa kanjani.
“Inhloso yethu wukuthi umphakathi uqhubeke uzakhele amathuluzi udayiselane ukuze kusizakale bonke abafundi. Abathole amakhono bazokwazi ukuya nakwezinye izindawo ezingenawo ugesi bathengise leli thuluzi,” kusho yena.
UMnuz Bonga Sibiya ongomunye wabantu abahlomule ngekhono lokwakha ithuluzi uthe: “Bengingakaze ngicabange ukuthi ngingaba usomabhizinisi ngokufunda amahora amahlanu. Njengamanje leli thuluzi silidayisa uR70 emphakathini senzela ukuthi nemindeni ephila ngemali yempesheni ilithenge,” kusho yena.
UNkk Lindiwe Madonsela, we-Uluma Entrepreneurship and Community Empowerment, uthe inhlangano yakhe isebenza ngaphansi kukamasipala wasOlundi.
“Le ndawo isemapulazini ugesi awukho izigxobo zidlula kuyo ziyofakela omunye umphakathi. Ipulazi lisanda kubuyiselwa emphakathini kusazothatha isikhathi ngaphambi kokuthi ufakelwe ugesi ngenxa yokuthi umasipala wethu awunayo imali eyanele. Sibone ukuthi kungcono siphume siye ezikhungweni zemfundo siyocela usizo olungasiza umphakathi,” kusho yena.