Izaba zokwandisa abavakashi eKZN
SEZITHELEKE naseThekwini izithunywa ezingu-60 ezivela emazweni ahlukene aphesheya, ezizofunda kabanzi ngeKwaZulu-Natal ngenhloso yokuyokhuluma ngayo emazweni azo.
Lezi zithunywa ezivela eCanada, Ireland, Britain, Russia, Germany naseDenmark ziyingxenye yohlelo lweTourism Academy oluhlelwe yiFollow Me Africa, oluhambisana nezithangami zokucobelelana.
Lolu hlelo luhlose ukukhangisa ngamazwe aseAfrika. Izithunywa zifike ngoLwesihlanu olwedlule. Zizohlala esifundazweni kuze kube yisonto elizayo.
Kulindeleke zihambe namuhla eThekwini zidlulele kwamanye amadolobha, emuva kokukhonjiswa izindawo eziheha izivakashi nezinye ezinomlando namagugu.
Okhulumela iTourism KZN, uNksz Nhlanhla Ngwenya, uthe lezi zithunywa zibe nesithangami sokufundiswa ngeTheku, zakhonjiswa nezindawo nemikhiqizo ehehayo iTheku eligabe ngayo.
“Lokhu kuzosiza ukuthi zazi kabanzi ngesifundazwe, zikwazi nokusimaketha emazweni azo. Lezi akuzona nje izithunywa kodwa ziphethe izikhungo zokuvakasha emazweni azo.
“Yibona abaseqhulwini uma abantu bedinga ukwazi ngamazwe abangawavakashela, yingakho ukufika kwabo kuzobenza amanxusa ezwe lethu. Ngesikhathi kufika izivakashi esifundazweni siyasizakala ngokuthi umnotho uyakhula, kuvuleke namathuba omsebenzi esiwadingayo. Uma bevakashile basebenzisa amahhotela nezitolo zokudla, kusimame umnotho,” kuchaza uNksz Ngwenya.
Kwezinye izindawo esezivakashelwe yilezi zithunywa kubalwa iHluhluwe naseMkhuze.
Oyisikhulu esibambile kwaTourism KZN uNkk Phindile Makwakwa, uthe ukufika kwalezi zithunywa kuzokwenza ukuthi zilethe abanye esifundazweni.
Uthe kuzoba lula ukudlulisa umyalezo emazweni abo ngoba sebezibonele isifundazwe.
“Inhloso enkulu ukuthi lezi zithunywa zibe ngamanxusa esifundazwe sethu ngoba izivakashi zithinta zona uma zifuna ukwazi ngezindawo ezingazivakashela. Siyazi ukuthi isifundazwe sethu sihle futhi asingabazi ukuthi nezivakashi zingathanda ukuzozibonela,” kusho uNkk Makwakwa.
Kuthiwa zilinganiselwa ku-150 000 izivakashi zaseGermany, London naseUnited States of America ezivakashela isifundazwe ngonyaka. Kunethemba lokuthi lesi sibalo sizokwanda emuva kokuvakashela kwalezi zithunywa.