ITouch Africa inabaculi abasha
IZELWE kabusha inkampani yokuqopha yaseThekwini iTouch Africa Records njengoba isayinise abaculi abasha abathathu.
Le nkampani ephethwe nguMdu Ngcobo isineminyaka ikhona njengoba ike yaphatha iqembu lamantombazane iDa Babes, Msawawa, Ntokozo Masinga nabanye abaningi.
UNgcobo uthe abaculi abasha asesebenza nabo nguLasandra, Prince M, Csana noDJ Sammy K, ongumfowabo kaNaima Kay naye oqopha kulesi sitebela. Inkampani isanda kuhlukana noScelo Gowane.
“ETouch Africa sithi #siyacula, bonke laba baculi esinabo bayacula, lalela amaphimbo abo nabakusho ezingomeni zabo. Benza i-Afro pop ne-Afro soul ngaphandle kukaSammy. “USammy unguDJ wokuqala ukuthi sibe naye enkampanini futhi inhloso yethu ngaye wukuthi zonke izingoma zabaculi bethu esizenza kabusha ngesigqi se-house sizinikeze yena,” kusho uNgcobo.
Uthe bonke laba baculi basestudiyo bapheka umculo omusha.
“ULasandra ukhiphe ingoma yakhe yokuqala ethi Umakoti futhi uqedela i-albhamu yakhe ezoba nezingoma ezingu-10 ezophuma kulo nyaka. EkaPrince M iyadidiyelwa, manje useqedile ukuqopha kanti uNaima Kay usenze izingoma ezinhlanu futhi uzokhipha ekupheleni kukaJulayi. USammy noCsana bazokhipha izingoma ezihamba ngazinye, amaalbhamu sizowabona ngonyaka ozayo,” kuqhuba uNgcobo.
Uthe bonke laba baculi abantu bazobabona ngempelasonto emcimbini wokugubha usuku lokuzalwa kukaNaima Kay. NgoLwesihlanu bazobe beseSenzi’s Lounge, eMargate, kuthi ngeSonto babe seMashamplanez Lounge, ePort Shepstone.
Bazobe behambisana noL’vovo, Danger, Biggie, Da Babes, Merlon, TDK Macassette, DJ Happy Gal, Kotin, Boonu, 101 nabanye.
UNgcobo ubuye waveza ukuthi seziqalile izinhlelo zomcimbi iJazz in July eba ngeSonto ngempelasonto yeDurban July. Uthe uzowethula uma kuqala inyanga nokuyilapho ezodalula khona zonke izinhlelo ngawo.