UMpukane uzohlekisa ngosaziwayo
UKUSHABALALA okwamazolo ebona ilanga kobudlelwano bendlovukazi ye-gqom,’ uBabes Wodumo nesihlabani sekwaito uMampintsha nobebuphakathi kweFirst Lady of kwaito uMshoza nosomabhizinisi waseBergville uThuthukani Mvubu, ngeke kusale emahlayeni azobe eqhululwa wumsakazi weGagasi FM, uMpukane ‘Flymotion’ Makhanya.
Lo somahlaya waseClermont futhi owethula imibiko ngezingqinamba emigwaqweni, uzobe ehlekisa yedwa emcimbini awubiza ngokuthi, It’s Not A Lie, eGolden Horse Casino eMgungundlovu, ngoJuni 1.
Kulezi zinsuku udaba lukaBabes noMampintsha lusematheni futhi kusolwa uMampintsha ngokuhlukumeza le ntandokazi ebiyisinqandamathe sakhe. NoMshoza uphume kabuhlungu emzini ngemuva kokuvela kwezinsolo zokushendeza nephoyisa kodwa yena uveza ezokuthi naye ubehlukumezeka kulobu budlelwano. UMpukane uthembise ukugeqa amagula ngakho konke okusematheni eNingizimu Afrika nasemhlabeni jikelele.
“It’s Not A Lie, iqiniso liyababa kanti liyahlekisa. Abantu bazobe bezihleka bona, ngibhale amahlaya ngobudlelwano futhi ngizobuye ngiqwashise nangokuhlukunyezwa kwabantu besifazane, ikakhulukazi njengoba kunale nkinga enzima kakhulu yokubulawa kwabantu besifazane.”
UMpukane uthe kulokhu uzobe egxile emahlayeni amasha wodwa.
“Lo mjikelezo wamahlaya uzodlulela eNewcastle naseRichards Bay bese ngiwuvala eThekwini ngaphambi kokuba ngiye kwezinye izifundazwe.”
Uthe okuzobe kuhlukile ngalo mcimbi ukuthi abantu bazobuyela emakhaya befunde lukhulu ngenxa yamahlaya akhe. “Kubalulekile ukuthi abantu bahleke kodwa kubekhona okubambekayo, kungabi sekuhlekwa kuphela kodwa bangatholi sifundo. Ngiyaziwake ukuthi ngikhuluma ngezinto ezenzeka elokishini, emsebenzini nje nasemakhaya kanti nami sengikhulile kule ndima.” UMpukane uqale ukuhlekisa ngeminyaka yawo-1990 esafunda eZiphathele High ngaphambi kokubonakala emafilimini abeziqophela wona.
Kusukela lapho ube esehlekisa ededelana nezinye izilomo zosomahlaya emicimbini emikhulu okukhona kuyo i-99 % Zulu Comedy Show neMzansi Comedy Show. Kwi-It’s Not A Lie kuzobe kungenwa ngethikithi likaR150 emnyango.