IDeep Breath yethula umculo wayo omusha
UKULANGAZELELWA komculo wabo ngabalandeli kwenze ukuthi iqembu iDeep Breath lipheke umculo omningi elizokwazi ukuwukhipha ngisho limatasa.
Leli qembu lihlanganiswe yizinsizwa, uCebo Mthwane (25), Joseph Dube (24) noThato Motsepe (32).
UThato uthe ukungakhiphi lutho kwabo ngonyaka odlule kwenze ukuthi abalandeli babo bakhalele umculo omusha. Phambilini babededele ingoma ethi Pearl.
“NgoJanuwari senze isiqiniseko sokuthi siqopha izingoma ezanele ukuze noma ngabe simatasa ngemicimbi kodwa abantu bakwazi ukuthola umculo omusha,” kusho uThato.
Bakhiphe izingoma ezintathu kanye kanye iWoza Nana, 1 In A Million neFind Your Peace. Zitholakala ezitolo zomculo ze-internet.
“Umculo wethu ungathi yi-urban soul. Uhlanganise iR&B, soul nowomdanso kodwa siwenza ngendlela yesimanje. Ukhuluma ngothando nangempilo futhi ubuyisa nethemba. Negama liyasho lithi Deep Breath okusho ukukhokha umoya ubuye usunomndlandla. Nomculo wethu unjalo,” kusho uThato.
Lezi zinsizwa eziqhamuka ezindaweni ezahlukene, zihlangane ngo-2015 esikoleni iCreative Arts lapho zazifunda khona umculo. UCebo, oculayo ngowasePort Shepstone, uJoseph owaseThekwini futhi udlala i-keyboard kanti uThato odlala ama-drums udabuka eGoli.
“Sathi uma siqala sabona ukuthi abantu bayayithanda into esiyenzayo sabe sesiqala sidlala emicimbini.”
Selinandise emicimbini eminingi eyahlukene okubalwa kuyo ne-Essence Festival.
NgoMgqibelo leli qembu lizobe lethula bukhoma ngokusemthethweni izingoma zalo eViews at Twenty5, eThekwini. Umcimbi uzoqala ngo-5 ntambama.