URobbie Jnr uthembisa okuhlukile kunoyise
INDODANA yengwazi yomculo engasekho, uRobbie Malinga, isilandele ezinyathelweni zikayise yangena emculweni.
URobbie Malinga Jnr (16) uthe yena uza nokuhlukile kunobekwenziwa nguyise ngoba wenza i-hip hop.
URobbie Malinga, ozakhele udumo ngokuba wumdidiyeli aphinde abe ngumculi, udlule emhlabeni ngoKhisimusi wonyaka odlule ngemuva kokuxinwa wukugula abesehambe nakho isikhathi eside.
“Njengamanje ngisestudiyo ngihlanganisa izingoma zami zokuqala engizozikhipha maduze,” kusho uRobbie Jnr.
“Kumele ngiyenze le nto akukho okunye engingakwenza. Kumele igama likababa lingafi kodwa kumele liqhubeke yingakho ngizophusha,” kuqhuba yena.
Uthe uyise ubeke isisekelo esiqinile azosebenzela phezu kwaso futhi uyayazi ingcindezi azobhekana nayo.
URobbie Jnr ofunda uGrade 10 uthe umculo uzowuqhuba ngamaholidi ukuze angaphazamiseki esikoleni.
“Ngisakwenza kahle lokho ngoba nasesikoleni ngiqhuba kahle. Ngivele ngenza okunye eceleni ngoba ngiyamodela. Kuningi abantu abasazokubona.”
Ngeledlule abanye abantu bakhombise ukwethuka ngokubona ukuthi ikhasi lika-Instagram likaRobbie liyasebenza yize engasekho.
URobbie Jnr uthe lisetshenziswa nguye futhi akayiboni inkinga ngoba amagama abo ayafana.
Uthe okwamanje usaqopha ngaphansi kwenkampani kayise iRobbie Malinga Entertainment eyenganyelwe nguSipho Dube owayeyimenenja kaRobbie.
“Maduze abantu bazozwa ngenkampani yami nendodana kaNhlanhla Nciza uNkululeko.”
Uveze ukuthi impilo ihamba kahle kuye nonina yize besazama ukwamukela ukuthi uyise akasekho.