Ukhombise enkulu indelelo umfundi ovimbezele uthisha
ZININGI izinselelo ezikhona kwezemfundo eNingizimu Afrika futhi othisha bangabanye babantu abathwele kanzima emsebenzini wabo. Ukudelelwa nokuhlukunyezwa yizingane abazifundisayo ngezinye zalezi zinselelo ngoba sebaphelelwa yisithunzi.
Kukhona abaye bathi othisha baziqeda bona isithunzi ngendlela abanye babo abaziphatha ngayo njengoba bephuza futhi bejola udede nezingane abazifundisayo ezigcina sezibona ontanga bazo uma zibona othisha.
Yize bekhona labo thisha abangamazambane abolile kodwa ayikho ingane enegunya lokwenza ngendlela okuthiwa kwenze ngayo umfundi wakwaGrade 5 esikoleni iSheshane Primary eNquthu.
Lo mfundi kuthiwa uvimbezele uthisha emnyango ngoba emsola ngokuthi akamvikeli ezinganeni ezimhlukumezayo kunalokho uthethisa yena. Kuthiwa kuze kwafika udadewabo womfundi nenduku nabazali bakhe bezolekelela ingane ukuthi ilwe nothisha, bavalela wonke umuntu ngaphakathi kwasiza ukufika kwamaphoyisa.
Ukuthi amanyala anjena enzeka kanjani, ingane ize ivunwe ngisho nangabazali bayo ukuthi idelele uthisha ongumuntu omdala yinto emangazayo.
Njengoba siye sibagxeke othisha abaphula imithetho yomnyango wezemfundo nomfundi owenza njengalona sizomgxeka ngoba lokhu akwenzile akuvumelekile futhi kuyindelelo.
Bekufanele umnyango wezemfundo umxoshe lo mfundi kulesi sikole ngoba kuyacaca ukuthi sekuzoba lukhuni ukuthi aqhubeke kuso. Bazomkhuza kanjani othisha abamfundisayo uma enza njena?
Isikole akuyona indawo yamabhoklolo okufanele acanase emakhanda othisha. Lokhu akwenzile esizwa ngabazali bakhe kuhlukumeze othisha nabafundi.
Abazali kufanele babambisane nothisha ekukhuliseni ingane ezoba ngumuntu oqotho hhayi lokhu okwenziwe yilaba abaqeqesha isixhwanguxhwangu.
Ngeke sabalawula abazali balo mfundi ukuthi bazikhulise kanjani izingane zabo, uma bethanda ukukhulisa izingane ezingophuma silwe okwabo lokho kodwa ukuthanda impi kwabo akufanele bakulethe esikoleni ngoba isikole yindawo yokufunda hhayi yempi.