Zixoxa indaba izikhwama zabesifazane
ISIKHWAMA siwumngani omkhulu kwabesifazane, bajwayele ukuba nezinhlobonhlobo zazo. Uhlobo lwesikhwama abasiphathayo sihambisana nomcimbi noma izinhlelo zosuku.
Inkampani edayisa ngezikhwama nezinye izimpahla kuleli, iBeetroot Inc, ithi lonke uhlobo lwesikhwama luchaza kabanzi indlela owesifazane ayiyona. Baveze ezinye izinhlobo zezikhwama abathi ziyakhuluma zabesifazane. Balinganise ngesikhwama esikhulu abathi sijwayele ukuphathwa ngosuke ewumfundi ngoba isikhathi esiningi izincwadi zihlala kahle. Siyaphathwa nayilowo okhonze ukuzivcavoca, ohlala ephethe izimpahla ezengeziwe. Nazi ezinye izinhlobo zezikhwama nencazelo yazo:
Ubhakha Ujwayele ukuphathwa ngabafundi kodwa uyakhuluma nangohlobo lwabesifazane.
Uchaza ukuthi ungumuntu ovulelekile ukuqala okusha. Ufuna ukubamba zonke izinto ngokuphuthuma. Ufuna izandla zakho zikhululeke ukuze ukwazi ukuxhawula, ukuthinta nokushutha.
Sling/Postman’s Bag Uyathanda ukuxoxa nabantu, umsebenzi ubalulekile kuwena. Uyakwazi ukugxilisa umqondo wakho kokwenzayo. Ukhonze ukuqoqa lonke ulwazi nesipiliyoni lapho udlula khona. Lesi sikhwama senza kube lula ukuqoqa konke ngaphandle kokubambezeleka.
Tote Bag (esikhudlwana)
Kuningi okwenzeka empilweni yakho futhi uzama ngayo yonke indlela ukunakekela wonke umuntu. Uthanda ukuphatha konke okungenzeka ukudinge. Uhlala ulindele ukusiza ngaso sonke isikhathi, kwesinye isikhathi okungaba ngaphezu komthwalo onawo. Ungumuntu ohlelekile ofuna ukuhlelela nokungakafiki.
Handbag Uhlala ufuna ukubukeka kahle futhi lesi sikhwama sikwenza uzizwe uphelele. Unazo ezinye izikhwama kodwa azikugculisi ngoba azihambisani nendlela ofuna ukubukeka ngayo. Ungumuntu othanda ukudla ingqephu, oqinisekisa ukuthi izinzipho nezinwele zihlala zenziwe kahle.