UMbuthuma usanethemba ngeComrades
AKALIPHONSILE ithawula ngokuthi ngelinye ilanga anqobe isicoco seComrades Marathon, uFikile Mbuthuma, okunguyena ohlezi emele imbokodo emnyama kwabenza kahle kulo mjaho.
UMbuthuma (37) usegijime kulo mjaho ongeminye yemikhulukazi emhlabeni kusukela ngo-2006. Kulo nyaka uzobe ebheke ukuthola indondo yakhe ka-12.
Umjaho ungoJuni 10 lapho kuzobe kusukwa eMgungundlovu kubhekwe eMoses Mabhida Stadium, eThekwini.
Ngesikhathi ekhuluma neSolezwe ngempelasonto emcimbini iComrades Ladies Extravaganza eSahara Stadium, eThekwini, uveze ukuthi okusemqoka kulo nyaka wukuthi awugijime awuqede umjaho.
“Kulo nyaka inhloso yami ukugijima ngiwuqede umjaho. Anginakho ukungabaza ukuthi ngizoba kwabangu-20 bokuqala. Uma ngingena kwiTop 10 lokho kuzofana nebhonasi kodwa nakanjani ngizolithola isiliva. Kunzima ukunqoba iComrades kimina ngoba ngiyasebenza. Ngenza amahora ayisishiyagalombili emsebenzini. Emuva komsebenzi ngibe sengiyoziqeqesha. Kwesinye isikhathi uthola ukuthi ugcine usukweqa ukuziqeqesha kodwa ngihlezi ngizama ukuthi ngenze konke ngendlela elinganayo,” kusho uMbuthuma.
Isifiso salo mgijimi ongaphansi kweNedbank Athletics Club wukuthola abaxhasi.
“Uma ngingathola nabanye abaxhasi ngingakwazi ukugxila ekugijimeni kuphela nokunganginikeza amathuba okunqoba isicoco. Kodwa ngeke ngiliphonse ithawula ngingakawunqobi umjaho. Ngizozama kuze kungilungele.”
UMbuthuma usebenza njengomabhalane eMedicross Clinic eMalvern, eThekwini. Uthola usuku olulodwa kuphela lokuphumula esontweni.
“Uma ngingathola inyanga ephelele yokuzicija ngiyakholwa ukuthi ngingayinqoba iComrades kodwa angisitholi isikhathi ngoba kumele ngisebenze. Ngaqala ukugijima iComrades ngizigijimela nje. Ngathola isiliva ngiqala, ngase ngilandelisa ngegolide. Indondo yegolide iyona eyangikhuthaza yingakho ngifuna ukuzuza okunye okukhulu.”
Lo mgijimi odabuka eHarding, KwaZulu-Natal (KZN) uke walimala edonseka umsipha kodwa uthe usewulungele umjaho walo nyaka.
“Sengiluleme. Ngike ngagijima eminye imijaho yokuzilungiselela, iTwo Oceans Marathon nomunye oseSouth Coast ngawunqoba. Ngiyilungele iComrades.”
UMbuthuma nguyena ohlezi ephephezelisa ifulegi leKZN ngokuba ngowokuqala wesifazane ukuqeda. Nakulokhu ubheke ukwenza okufanayo. Nyakenye uthole isiliva eqeda endaweni ka-13.