ABALANDELI BE-CHIEFS ABAYIZWA EYENDEBE YAKA-SHELL
SEKUMCACELE uPotshoza ukuthi indlela iKaizer Chiefs ebalimaze ngayo abalandeli bayo ngesizini esanda kusongwa zisekude ukuphola izilonda ezishiye kubona.
Abalandeli abafuni kuzwa lutho oluqhamuka kwiChiefs uma kungesikhona ukuthi ibatshela ngokuthi ngubani umqeqeshi omusha weqembu.
Lezi yizona izindaba abazilindele ngabomvu kusukela kwasula uSteve Komphela abashiye bengazange banqobe lutho kumasizini amathathu.
Leli qembu like laveza ekhasini lalo enkundleni yokuxhumana iFacebook ukuthi linomtitilizo wokuyobuka umjaho wamahhashi, iVodacom Durban July. Iningi labalandeli likuveze obala ukuthi aliyingeni leyo.
Muva nje bekwethulwa umqhudelwano ozokwandulela isizini entsha lapho iChiefs izoqhuthana nompetha be-Absa Premiership iMamelodi Sundowns. Nakhona iningi labaphawulile, libuze ukuthi uphi umqeqeshi omusha nabadlali abasha.
Le ndebe ebizwa ngeShell Helix Ultra Cup izodlalelwa ngoJulayi 21 eFNB Stadium, eGoli.
“IChiefs izama ngayo yonke indlela ukunqoba indebe? Uma iSundowns inqoba kuzokwe-nzekalani? Nizokwenza iCaltex noma i-Engen Cup? IChiefs yami isiyihlaya,” kubhala uThabo Zac Sehoapa.
UMashe Drum uthe: “Asikho isidingo sokudlalela le nkomishi. Inikeni iSundowns. Ngiwumlandeli weKhosi kodwa angisenandaba. Sidinga ushintsho. IChiefs izoluthola kanjani ushintsho uma sisathembela kumdlali ofana noBernard Parker. Sidinga izinyawo ezintsha.”
Abanye babaze ubukhulu beChiefs ngokuthi akekho ongafuni ukufaka imali uma lingekho igama layo. Benza isibonelo ngeCarling Black Label Cup neMaize Cup. UPotshoza usengabakhumbuza abalandeli beMpofana ukuthi le miqhudelwano engathi shu iyona enqotshwe uKomphela eminyakeni emithathu eyihlale eNaturena.