Akwehlanga kahle ukulimala kukaSalah
KUFANELE ukuthi bonke abantu base-Egypt abazifela ngonobhutshuzwayo emithandazweni yabo bazobe bekhulekela ukululama okusheshayo kwesilomo somdlali wakhona, uMohamed Salah, ngaphambi kokuthi kuqale iNdebe yoMhlaba.
INdebe yoMhlaba, umqhudelwano omkhulukazi emhlabeni ebholeni, izoqala ngoJuni 14 eRussia. USalah, okungangabazeki ukuthi uyisethenjwa sabantu base-Egypt, ulimale ehlombe ngesikhathi iqembu lakhe iLiverpool litholene neReal Madrid kowamanqamu we-Uefa Champions League ngempelasonto. Lokhu kuholele ekutheni angabe esawuqeda umdlalo waphuthunyiswa esibhedlela.
Ekuqaleni kwesonto inhlangano eyengamele ibhola e-Egypt imemezele ukuthi uzokwelashwa ngokukhethekile eSpain lapho ezobe ebhekwe nangodokotela beLiverpool.
Indlela ezingehlanga kahle ngayo izindaba zokulimala kukaSalah kuholele ekutheni esinye isiququmama sase-Egypt sihlele ukumangalela ukaputeni weMadrid, uSergio Ramos, olimaze uSalah, simfune izigidi ngokulimaza isithandwa sabo.
“Udokotela uMohammed Abu Ola usibikele ukuthi odokotela beLiverpool bamtshele ukuthi uSalah uthinteke ehlombe kodwa sinethemba lokuthi uzokwazi ukujoyina iqembu elizoya kwiNdebe yoMhlaba,” kusho isitatimende senhlangano ekhasini layo le-twitter .
USalah ukhombise ukuba yisibabuli phambi kwamapali kwisizini esanda kusongwa ye-Premiership e-England lapho eqhulule khona amagoli awu-32.
Ushaye amagoli awu-44 kuyona yonke imiqhudelwano kwisizini eyodwa. Ubengagcini ngokuba yisethenjwa samaReds kuphela kodwa naseqenjini lesizwe ubevutha engabaselwe. Emidlalweni yamaqoqo kweyokuhlunga ushaye amagoli kuyona yonke imidlalo ayidlalile. Kuwona kukhona nephenathi ayishaya emdlalweni wokugcina bedlala neCongo. Ngesikhathi kubanjenwe ngo 1-1. I-Egypt yathola iphenathi ngomzuzu ka-94 okuyiyona eyayizoyifaka eRussia, wayinamathisela phakathi uSalah ebhekwe yizwe lonke.
Kungokokuqala iya kwiNdebe yoMhlaba selokhu yagcina ngo1990 e-Italy. Ngaphambi kwalokho yayidlale emqhudelwaneni wango1934. Kuzona zombili izikhawu i-Egypt iphume esigabeni samaqoqo.
Akungabazeki ukuthi uSalah, owumqemane, ubezonikeza abalandeli bezwe lakhe ithemba lokwenza okungcono, okuwukudlulela esigabeni seLast 16 okokuqala emlandweni.
I-Egypt iqhathwe ne-Uruguay ezovula nayo umqhudelwano ngoJuni 15. Ku-Group A kukhona nosokhaya iRussia neSaudi Arabia.