Kulindelwe izimanga zikaMusonda
IFOMU yomgadli weBlack Leopards,uMwape Musonda, kubonakala kuyiyona ezoweza ngelibanzi leli qembu laseLimpopo emidlalweni yokuhlungela ukukhuphukela kwi-Absa Premiership.
Ngesikhathi iningi ligxile emdlalweni wamanqamu we-Uefa Champions League ngempelasonto, lapho umdlali weReal Madrid,uGareth Bale, eshaye uqethu wegoli elibalwa kwabadle ngawo iLiverpool, uMusonda ubenza okufanayo ezakhe zibhekene nePlatinum Stars eRustenburg.
Ushaye amagoli amabili kulo mdlalo ogcine uphele ngo 2-2. Lo mphumela ubeke iLidoda Duvha eqede endaweni yesibili kwiNational First Division (NFD), kumaphuzu amahlanu ngemuva kwemidlalo emithathu.
Kowokuqala engekho uMusonda bashaye iDikwena ngo 1-0,babambana ngo 2-2 neJomo Cosmos. Nakuwona lo mdlalo lo mgadli odabuka eZambia waphuma namagoli amabili. UMusonda uqhulula amagoli nje nasemidlalweni yeligi yeNFD uqede engomunye wabahamba phambili ngamagoli angu-15. Namuhla iLeopards izokwamukela iCosmos enamaphuzu amabili eThohoyandou ngo-3 ntambama.
ILeopards idinga ukunqoba lo mdlalo ukuze kube iyona ethatha indawo ka-16 kwi-Absa Premiership ngesizini ezayo.
Umqeqeshi weLeopards, uJoel Masutha,uthe akumethusi okwenziwa uMusonda enkundleni.
“Sasimdinga emdlalweni wokuqala sesiyajabula manje ngoba usebuyile. Ungumdlali ohlezi esebenza ngokuzimisela ngakho ayingimangazi indlela enza ngayo. Ngisho ozakwabo abakwesabi ukumfakela ibhola noma ngabe ukuphi ngoba bayamethemba ukuthi uzowenza umsebenzi,” kusho uMasutha.
Ulindele ukuthi lo mgadli oseke waba semabhukwini e-Orlando Pirates wabolekiswa nakwiLamontville Golden Arrows aqhubeke nokuvutha phambi kwamapali.
Emdlalweni wokugcina kweyokuhlunga kuzotholana iCosmos neStars ngempelasonto. Nokho uzobe ungasasho lutho uma iLeopards inqoba namuhla.
“Kumele sinqobe ukuze siqede konke. ICosmos kungenzeka ihlale emuva ngoba iyazi ukuthi isenomunye umdlalo ngempelasonto,” kusho uMasutha.