UZongo ubalwa nabadliwe yizembe kwi-Eagles
KUXOSHWE isilomo somdlali odume ngokuthanda amabhodlela aluhlaza, uMasibusane “Zizou” Zongo obegijima kwiRoyal Eagles.
Isolezwe lithole lezi zindaba ngoJames “Matatazela” Dlamini oyimenenja yeqembu.
“UZongo ungomunye wabadlali beqembu abangeke baze babuye. Inkontileka yakhe iphelile iqembu lathatha isinqumo sokuthi ngeke liyivuselele. Simfisela inhlanhla lapho eya khona. Abanye abadlali izinkontileka zabo ezingazange zivuselelwe nguMpho Mvelase, Thabo Mokgothu, Sandile Kubheka noMame Niang,”kusho uDlamini.
UZongo (28) uzakhele igama ngokudlala ibhola elineNkosi phakathi kodwa wekuhlulwa wukuziphatha. Usezanywe kaningi ngemuva kokwenza amaphutha. Uqale ukugqama kwiSuperSport United.
Kuleli qembu wagcina ekhululiwe ngenxa yakho ukuhluleka wukuziphatha. Phakathi kwamaqembu aseke wayibamba kuwo kukhona iVasco Da Gama, Chippa United, Platinum Stars noMthatha Bucks.
Uke wayibamba nasemaqenjini esizwe akuleli amancane.
Ubuyele kwi-Eagles phakathi nesizini kwazise uke waboshwa esolwa ngokudlwengulwa kodwa waphuma phambili bungekho ubufakazi. Izikhulu ze-Eagles zikhombise uzwelo ngoba yizona ezimkhiphe ejele zaphinde zamnika elinye ithuba.
Emidlalweni eminingi ubengena esuka ebhentshini. “UMame Niang usisizile kakhulu kodwa ibhola esilidlalayo alihambisani nesitayela sakhe. Yingakho sibone ukuthi singayivuseleli inkontileka. UPhilani Cele siyivuselele inkontileka yakhe,” kusho uDlamini. UBafana Nhlapho nguyena osezocija onozinti kwiEagles ngesizini ezayo. Iqembu lisathungatha iphini likaRoger Sikhakhane opheka iqembu.
I-Eagles ibivika izembe ngesizini edlule. Kusize ukufika kukaSikhakhane owenze ushintsho ngokushesha.
Kubhekwe ukuthi ibuye ngamandla ngesizini ezayo kulandela ukushaya udaka ngesizini edlule.