Kugiye abaseKZN kweyePSL
KUGIYE iKwaZulu-Natal (KZN) emcimbini wePremier Soccer League (PSL) wokuklonyeliswa kwabadlali abashaye into ecokeme ngesizini edlule eSandton Convention Centre, eGoli, izolo ebusuku.
Isibabuli somdlali weMamelodi Sundowns uPercy Tau yisona esithole imiklomelo emikhulu, iFootballer of the Season nePlayer’s Player of the Season. Le miklomelo ihambisana noR250 000 noR200 000 ngokwehlukana.
UTauuphinde wathola umklomelo wamagoli amaningi kwiligi awuhlukaniselane noRodney Ramagalela wePolokwane City. Bobabili baqede isizini benamagoli angu-11. Babelane uR25 000.
Ukuwina kukaTau le minxa akumele kuthuse njengoba ubevele ethwelwe ngeqoma kuyona. Lesi sikhwishikhwishi okungacaci ngekusasa laso kwiSundowns, siyisize yanqoba isicoco sayo seligi sesishiyagalombili. UTau kuyavela ukuthi kukhona amaqembu angaphandle amcathamelayo. Umqeqeshi wakhe uPitso Mosimane uhambe nowomqeqeshi ovelele noR75 000.
Ngaphambi kokuthi uTau angene esiteji bebelokhubengena beshintshana abadlali bamaqembu aqhamuka eKZN bezokwamukela imiklomelo.
USiphesihle Ndlovu weMaritzburg United, obeqokwe eminxeni emihlanu, ugoduke nemiklomelo emibili. Uthole owe-Absa Premiership Young Player of the Season noweMidfielder of the Season. Yomibili ihamba noR50 000. Kweminye uhlulwe uTau kwathi kweminye iminxa wadliselwa ogageni uzakwabo kwi-United uLebohang Maboe.
UMaboe unqobe kwiNedbank Cup Player of the Tournament nakwiNedbank Cup Most Promising Player, wagoduka noR50 000 noR150 000 ngokwehlukana kwemiklomelo.
UMaboe ube nesandla ekutheni i-United ifinyelele kowamanqamu WeNedbank Cup lapho ihlulwe iFree State Stars ngo 1-0. Iphinde yaqeda endaweni yesine kwi-log okuyinto engakaze iyenze.
USiyanda Xulu, oyibambe noMaboe noNdlovu kwiTeam of Choice,ugoduke noR50 000 ngokunqoba kwi-Absa Premiership Defender of the Season. I-KZN ibingakaqedi njengoba umdlali weLamontville Golden Arrows uSiphelele Magubane edle umhlanganiso kwi-Absa Premiership Goal of the Season ebivotelwa abalandeli. USiboniso Conco ube ngumdlali ovelele kwiMultichoice Diski Challenge ngokusiza Abafana Bes’thende yanqoba isicoco sabo sesibili seDiski ngesizini edlule.