Umndeni kaMjik’jelwa unqaba iminikelo
ABALANDELI BAMASKANDI BAVUTHELA ABAKWA-SABC
Nhlanhla Khaladoh Mazibuko: Impela nami angiyena umlandeli kamaskandi kakhulu kodwa iyangicika iSABC indlela eyenza ngayo ngamaciko alapha eNingizimu Afrika ngoba ikhetha iphela emasini indlela eye nza ngayo.
Sindi Mthembu: Angisiyena umlandeli kamaskandi. Alukho olutheni engilwaziyo ngawo kodwa khona le nto yakwaSABC iyacika futhi ifikiselana ngentukuthelo ngoba inokweyana phakathi. UBULAWE ESESITOBHINI EYA EMSEBENZINI
Zonke WakoNyawos: Hmmmmm abohlala bazi ukuthi izinyembezi aziweli phansi. Abajabule nje ngabantu besifazane kodwa nakubo luyeza usuku. Ulale ngokuthula dadewethu. UThixo uzokwenza umsebenzi wakhe.
Mfaniseni M Hlengwa Mashasha: Le nto yokuthi abantu babulale abanye bajike bayonethezeka emajele, badle kahle baze babe nezinhlangano zabo ezibamele, sengathi kuzomele ucutshungulwe.
ZIBUYELE emakhaya seziphoxekile izinyanga zodumo KwaZulu-Natal, uDkt Andile ‘Mzimbukhalimali’ Dlamini waKwaNongoma noMxolisi ‘Dr Mkhulu’ Nkomonde waKwaMhlabuyalingana, ngemuva kokwenqatshwa komnikelo wazo wenkomo ngumndeni wesihlabani somculo kamaskandi ongasekho uMjik’jelwa ‘Ichalaha LikaShafuza’ Ngubane kwaJikiji KwaMaphumulo.
Ngokusho komthombo, lezi zinyanga zithe zithi zishaya ucingo zifuna ukuza kwaNgubane, kwathiwa azingalubhadi olwazo naleyo nkomo.
UMzimbukhalimali uvumile ukuthi bahluleke bancama ukudlulisa isipho sabo. Uthe bebengahlosile okubi kodwa bebefuna ukuphelezela uMjik’jelwa ngenkomo.
“Bavele basihebeza sisekude, bathi asibuyele nayo emuva. Kuhluleke sesincenga. Lokhu besikwenza egameni lezinyanga njengoba besihamba noDr Mkhulu noKhekhelezi. Sengivele ngayihambisa ekhaya KwaNongoma le nkomo. Ngizoyifuya,” kusho uMzimbukhalimali osebenze kakhulu noMjik’jelwa emkhankasweni wakhe wokukhuza udlame kubalandeli bakamaskandi.
Okhulumela umndeni wakwaNgubane, uThembi ‘Zondwamadixa’ Ngubane uvumile ukuthi bazihebezile lezi zinyanga. “Besesithe sifuna inkomo yini?” Uthe basamile ekunqabeni iminikelo.
Akuzona lezi zinyanga ezibuyiselwe emuva nomnikelo kodwa nomculi obengamathe nolimi noMjik’jelwa, kodwa ebesebengcweka naye, uMthandeni ‘Igcokama Elisha’ Manqele naye ubuyiselwe emuva nowakhe umnikelo wemali. Umndeni kaMjik’jelwa, ngokubambisana nabaphathi benkampani yakhe, iMjik’jelwa Music Production and Entertainment neZihonga (okungabalandeli bakhe), uze wakhipha isitatimende esithi akuxoshwa muntu kodwa yiminikelo abangayithathi.
Lesi sitatimende sithi bacikwe yimibiko ethi, uMjik’jelwa ubengasenalo ngisho isenti futhi bese kunosomathuba ebese bevule isikhwama sokuqoqa umnikelo ngokugula kaMjik’jelwa. Sewuphetha umndeni kaMjik’jelwa uthe wonke umuntu ofisa ukuzongcwaba iqhawe labo wamukelekile “Amakhandlela/imali yamasoso yemukelekile kodwa ize ngelanga lokumfihla ngenxa yokubalekela lezi zizathu ezingenhla,” kuphetha isitatimende somndeni kamufi odlule emhlabeni ngezintatha zangoLwesihlanu ngemuva kokungeniswa esibhedlela eguliswa yizinyawo nesisu.
UMjik’jelwa uzofihlwa emathuneni asekhaya kwaJikiji kwaMaphumulo ngemuva kwenkonzo ezokuba kule ndawo ngoMgqibelo ekuseni. Namhlanje kulindeleke ezinye izinkumbi zabantu esontweni lakwaDube i-Ethekwini Community Church phakathi kuka-4 ntambama no-8 ebusuku. Kuzobe kunenkonzo yesikhumbuzo salo mculi owaduma ngengoma ethi Ngaphekwa YiBhova, Sengizodlala Amagwala nethi Ngiyaqhosha Ngiyaqholosha.