Umhlengikazi enkingeni ngezithombe azithumele isoka
USENKINGENI owesifazane waseMlaza othumele isoka lakhe lakuFacebook izithombe enqunu njengoba selifuna alikhokhele ukuze lingeke lizivezele umhlaba.
Owesifazane oneminyaka engu-40 ongumhlengikazi uthe akasakwazi nokuphuma endlini ngoba esaba ukuthi izithombe zakhe eziveza nobuso kungenzeka zisabalale ezinkundleni zokuxhumana njengoba isoka selifuna uR15 000.
Lo wesifazane ocele igama lakhe ligodlwe uthe akasalali njengoba isoka angakaze alibone ngamehlo limsabisa ngokusabalalisa izithombe ezimveza eshaya ngesudu yesele.
Elandisa Isolezwe uthe unonyaka aba nekhasi likaFacebook. Umenywe yileli soka elathi lingudokotela. Lamshela waliqoma.
Uthe bese benezinyanga ezimbili bethandana, konke bekuhamba kahle. Licele izithombe zakhe enqunu.
“Ngakhuza ibhadi ngesikhathi ecela izithombe zami nginqunu kodwa walokhu engibelesela ngokuthi angizithumele ngoba uyangithanda ufuna ukuzibukela zona uma engikhumbule. Ngagcine ngilingekile ngashutha ngabe sengimthumela. Ngamthumela ubuso ngingabuvezile, wacela ngiveze nobuso. Ngamthumela ngoba ngimethemba. Emuva kwesonto ngizithumele uzibuyisile, wathi ufuna uR10 000 ngaphandle kwalokho uzovezela wonke umuntu izithombe zami. Uphinde waqhamuka eseveze elinye igama wacela uR5 000. Kumanje unginikeze usuku ukuba ngimnikeze le mali,” kusho lo wesifazane.
Uthe uqale wazitshela ukuthi liyadlala isoka uma selifuna imali ngezithombe zakhe enqunu.
“Ngendlela ebengimthemba ngayo angizange ngizitshele ukuthi angangigila ngale ndlela. Ubengishayela ucingo zonke izinsuku, engitshela ukuthi uyangithanda. Bengimethemba ngoba ngicabanga ukuthi ungumuntu oqotho,” kusho lo wesifazane.
Uthe yize isoka belithi lingudokotela kodwa belike licele alithumelele i-airtime, akwenze lokho ngoba bethandana.
“Cishe sengimthumelele i-airtime kaR500 kulesi sikhathi sithandana,” kusho lo wesifazane.
Uthe ufisa ukuxwayisa nabanye besifazane ukuba bangagileki.
“Ukube ngangazi ngangingeke ngingene kule nkinga. Ngifuna nabanye baqaphele bangangeni enkingeni efana neyami. Bangakhulumi nabantu abangabazi, kwenziwe nezithembiso ezingekho,” kusho lo wesifazane. Icala ubengakalivuli emaphoyiseni.
Isolezwe lilibonile ikhasi kuFacebook laleli soka, belinezithombe ligqoke umfaniswano wodokotela, limi naseduze kwezimoto ezibizayo. Imizamo yokuthola isoka ukuba liphawule ayizange iphumelele njengoba ucingo lalo beluvaliwe.
Okhulumela amaphoyisa KwaZulu-Natal uColonel Thembeka Mbele uthe ziyanda izigameko zabesifazane abagilekayo ngenxa yokusebenzisa budedengu izinkundla zokuxhumana.
“Kunzima ukuvula amanye amacala enzeka koFacebook ngoba abantu basuke benza okuthize bevumelene njengakho ukuthumela izithombe. Okusemqoka ukuba abantu baqaphele uma besebenzisa izinkundla zokuxhumana ngoba kungabafaka ngisho nasengozini yokugcina bedlwengulwa noma bebulawa abantu abangabazi,” kusho uColonel Mbele.
Izinkinga ezingadalwa yizinkundla zokuxhumana:
■Abanye bathola amasoka nezintombi, bacele kuhlanganwe ezindaweni ezingamahhotela bagcine behlukunyezwa ngokocansi.
■Abanye baqolwa imali, ngokuthenjiswa uthando nobudlwelwane.
■Abanye kuntshontshwa ubuso babo, nemininingwano yabo isetshenziswe ukuqola abantu.
■Abanye kubhalwa amanga ngabo okubehlisa isithunzi, asatshalaliswe. Abanye bathenjiswa imishado. Abanye bakhokhiswa imali yokugibela amabhanoyi nokuqasha amahhotela abizayo.