AbeDSW bamincele ukuthola imiholo yabo
BAMINCILE, abazi ukuthi bazowuthola yini umholo wabo namhlanje abantu abayimithuthambi emalokishini eThekwini ngemuva kokuvela kokuthi iDurban Solid Waste (DSW) eMkhandlwini weTheku ishodelwa yimali.
Emhlanganweni wesigungu samakhansela alawula umkhandlu ngoLwesibili, abakwaDSW bethule umbiko abecele kuwo ukuthi kwenyuswe imali yenkontileka ewuR45 million yezinyanga ezintathu ibe wuR130 million wezinyanga eziyisithupha.
Imali iyona ekhokhela osonkontileka abaqoqa udoti emalokishini.
Abasebenzi abakhulume neSolezwe kodwa bacela ukuthi bangadalulwa ngoba besaba ukuthi bazoba senkingeni, bathe abazi noma bazohola yini namhlanje ngoba umnyango obaqashile untula imali.
“Sinovalo lokuthi kungenzeka singaholi njengabanye ozakwethu bakoNanda nakoNtuzuma osekuphele izinyanga ezimbili izinkampani ezibaqashile zingaholelwa ngoba kuthiwa ayikho imali,” kusho omunye wabasebenzi.
Uthe bafisa ukuthi umkhandlu usheshe uluxazulule udaba ngoba baningi abantu abaphila ngenkontileka yokuqoqa udoti.
Umhlangano wamakhansela omkhandlu kulindeleke ukuthi uphasise isicelo sabakwaDSW sokuthi banyuselwe imali yenkontileka ibenguR130 million wezinyanga eziyisithupha.
Kunezinsolo ezithi esinye sezizathu ezidala ukuba isheshe iphele imali wukuthi osonkontileka bafaka izicelo zokuthi bakhokhelwe imali enkulu engaphezu komsebenzi abawenzile nokuthi abanye osonkontileka bakhokhelwa bengasebenzanga.
USihlalo weKhokhasi ye-IFP eMkhandlwini weTheku, uMnuz Mdu Nkosi, uthe yinkohlakalo edinga ukuphenywa ukuthi kunezinkampani ezikhokhelwa zingasebenzile nokuthi ezinye zifaka izicelo zokuthi zikhokhelwe imali enkulu.
“Labo abanobufakazi ngale nkohlakalo abayilethe kithina ukuze senze uphenyo,” kusho uNkosi.
Ibamba lePhini leNhloko yakwaDSW eMkhandlwini weTheku, uNkk Noluthando Magewu, lithe imali abayicelayo izokwazi ukuxazulula ingqinamba ababhekene nayo.
“Asifuni ukuthi sinikewe uR130 million kodwa sithi akwenziwe izinguquko esivumelwaneni senkontileka ,” kusho uNkk Magewu.