Badele umsebenzi belwela ukuhlala kolindela
BAVUKE umbhejazane bavala umgwaqo abahlala kolindela baseLamontville, izolo bethi ngeke bangene abophiko lwezezindlu eThekwini, obekuthiwa bazofika kule ndawo bakhiphe abahleli kuyo ngokungemthetho.
Abahlali bakule ndawo eyaziwa ngokuthi isemathinini, emgwaqqweni uGwala abazange balubhade emsebenzini izolo. Bavimbe umgwaqo ongenela kule ndawo ngezihlahla namathayi avuthayo.
Ekuseni kuthiwa akekho umhlali wakule ndawo obevumeleke ukuthi aye emsebenzini, izingane zesikole kuphela ebezivumelekile ukuthi ziye esikoleni.
Omunye wabahlali bakule ndawo ongathandanga ukudalulwa, uthe abakwamasipala bafike kule ndawo ngoMgqibelo bezoshintsha izinombolo zolindela.
“Ngesikhathi benza lokhu bebecela imininigwane eveza ukuthi ubani ohlala endlini nencwadi eyimvume ephuma kwamasipala emgunyaza ukuthi ahlale kuyo. Kunabantu abalinganiselwa ku-200 okutholakale ukuthi abanazo izincwadi zokuhlala lapha. Siyakuvuma lokho kodwa sithi umasipala wenza iphutha ngokuthi ngesikhathi unikeza abanikazi balawa mathini imixhaso, ungawadilizi, kwangena abanye abantu kuwo. Labo bantu baqala ukuhlala kuwo ngo-2009, abanye ngo-2008. Sonke lesi sikhathi umasipala ubukuphi njengoba usufika sekuphele iminyaka engu-10 behleli,” kubuza yena.
Uthe umthetho wakuleli awuvumi ukuthi kukhishwe umuntu osehlale isikhathi eside endaweni, anganikezwa indawo azohlala kuyo.
“Sakhuluma nabasehhovisi lezezindlu sibabuza ngalokho, esikhundleni sokuthi balibone iphutha basitshela ukuthi abanandaba nokuthi abantu sebehlale iminyaka emingaki kule ndawo, abakwaziyo ukuthi abanayo imvume yokuhlala kolindela. Ngeke sivume ukuthi siphucwe ilungelo lethu, sizovala lapha bangangeni baze balandele umthetho wokuthi uma bebakhipha lapha babanike enye indawo abazohlala kuyo,” kusho umhlali.
Omunye wabahlali obevimbe emgwaqweni uthe noma bengafika nini abakwamasipala bazofika bebalindele.
UMnuz Mandla Nsele okhulumela umasipala weTheku uthe uzophawula uma esethole imininingwane ephelele ngalolu daba ophikweni lwezezindlu.