Bakhala ngokunyuka kwemali yokugibela
INHLANGANO yabakhokhi bentela eThekwini i-Active Citizens’ Movement (ACM) ishaya amakhala ngesinyathelo soMkhandlu weTheku sokwenyusa imali yokugibela amabhasi ngo-8% kusukela kusasa.
USihlalo we-ACM eKZN, uMnuz Ben Madokwe, uthe leli phesenti umkhandlu onyusa ngalo imali likhulu, lizokwenza ukuthi abagibeli badonse kanzima kakhulu.
“Amabhasi awabantu abahluphekayo hhayi abanemali, uma sekunyuswa imali kangaka, abantu bazoyithathaphi?” kubuza uMadokwe.
Uthe esinye isizathu esenza ukuthi bangahambisani nokwenyuswa kwale mali ukuthi umsebenzi wenkampani yamabhasi awujabulisi.
“Uma uyikhasimende uye ufune ukuthi ukhokhele into ekujabulisayo kodwa abagibeli abaneme ngendlela amabhasi omkhandlu asebenza ngayo,” kusho uMadokwe.
Uthe bahlale bethola izikhalo kuthiwa amabhasi awekho, kwezinye izikhathi kusuke kuthiwa athathe abantu abaye emibuthanweni yamaqembu ezombusazwe.
Uthe ngesimo somnotho esikhona ezweni abantu ngeke bakwazi ukukhokhela amabhasi.
Uthe sisodwa isisombululo, ukuthi umkhandlu uwathathe amabhasi uwabuyisele ngaphansi kwawo.
“Kunezinkinga eziningi njengoba amabhasi engekho ngaphansi komkhandlu kufakwana ezinkantolo, siyanxusa uNgqongqoshe wezokuBusa ngokuBambisana neziNdaba zoMdabu KwaZulu-Natal, uNkk Nomusa DubeNcube, ukuba angenelele kulolu daba,” kusho uMadokwe.
INhloko kuPhiko olubhekelele ezokuThutha eMkhandlwini weTheku, uMnuz Thami Manyathi emhlanganweni wemakhansela alawula umkhandlu, uthe benze lonke ucwaningo bebheka nokusebenza kwamabhasi base befinyelela esinqumeni sokuthi bayinyuse imali.
UManyathi uthe bayinyuse kancane imali uma beqhathanisa nezinye izinkampani zamabhasi eziyinyuse ngo10%.
Uthe imali yezingane zesikole, abahola impesheni nabakhubazekile ngeke inyuke.
USihlalo wekhokhasi yeDA eMkhandlwini weTheku, uNksz Nicole Graham, uthe abahambisani nokwenyuswa kwemali yokugibela amabhasi.
USihlalo wekhokhasi ye-IFP emkhandlwini, uMnuz Mdu Nkosi, naye uthe abahambisani nombiko wokwenyuswa kwemali.