Kufunwa indodakazi okuthiwa idlwenguliwe
UKHATHAZEKILE umndeni wentombazane (14) yaseManguzi ebalekile ekhaya ngemuva kokuboshwa kukayisemkhulu osolwa ngokuyidlwengula.
Umkhulu (58) kade evelile enkantolo yaseManguzi ngoMsombuluko ngecala lokudlwengula umzukulu wakhe, icala lahlehliselwa uJuni 4.
Unina wangane ehlukumezekile, izolo kade ekhuluma neSolezwe uthe osekubakhathaza kakhulu ukuthi akaziwa umgilwa ukuthi ubaleke waya kuphi.
“Uboshwe ngoLwesihlanu emuva kokuvela ukuthi ubehlala ngokudlwengula indodakazi yami. Ugcine ukuyidlwengula ngoMeyi 23 kade iphuma esikoleni iyolanda izincwadi kumngani wayo. Icala livuliwe. Sibe sesinikezwa imishanguzo esibhedlela ukuba ayisebenzise.
NgoLwesibili ngamvusa ukuze ngimphuzise, waphuma engumuntu oya endlini encane, asikaze size simbone. Nasezihlotsheni akekho. Namhlanje uLwesithathu, asimazi ukuthi ukuphi. Sikhathazekile kakhulu ngokuduka kwakhe,” kusho unina.
Umsolwa kuthiwa ubejwayele ukubiza umgilwa ukuba azomsiza ngezinto ezehlukene zasendlini.
Phambilini uthe indodakazi yakhe yake yaveza ukuthi umkhulu wayo uyiqabule esihlathini wathi uyayithanda.
“Ngabiza amaphoyisa emuva kokumhudula emgwaqweni, wamphoqa ukuba baye endlini wafika wamdlwengula. Indodakazi yabaleka yafika yasho konke okwenzekile. Ngiphatheke kabi ngoba bengimethemba njengomuntu ofana nobaba kimina nomkhulu enganeni yami,” kusho unina wentombazane.
Uthe njalo uma ehamba nendodakazi yakhe umsolwa ubejwayele ukubapha imali athi eyomzukulu azothenga ngayo isiphuzo. Uthe lo mkhuba ucabanga ukuthi ubegqiba ngawo indodakazi yakhe ukuba ingabiki ukuthi ubeyihlukumeza.
Unina wentombazane uthe basayithungatha indodakazi namaphoyisa bawabikele yize icala lokulahleka kwayo bengakalivuli.
Okhulumela amaphoyisa KwaZulu-Natal, uCaptain Nqobile Gwala, uthe baphenya icala lokudlwengula.
“Umsolwa (58) uboshwe ngecala lokudlwengula ingane eneminyaka ewu-14 eManguzi. Uphenyo lusaqhubeka,” kusho uCaptain Gwala.