Bazophephiswa abelomcwaningi
UNGQONGGQOSHE wezokuBusa ngokuBambisana neziNdaba zoMdabu KwaZulu-Natal uNkk Nomusa Dube-Ncube usezibophezele ekutheni bazophepha abasebenzi behhovisi loMcwaningi Mabhuku abacwaninga amabhuku komasipala besifundazwe.
UNkk Dube-Ncube ukusho lokhu kulandela uphenyo ngokusatshiswa komsebenzi womcwaningi mabhuku kuMasipala weTheku.
“Akukhona kwampunzi edla emini kuleli. Umcwaningi mabhuku nethimba lakhe bamukelekile ukuthi bazokwenza umsebenzi ngaphandle kokwesaba. Siyawethemba umsebenzi wakhe,” kusho uNkk Dube-Ncube esithangamini sabezindaba eThekwini izolo.
Usejube ithimba eliholwa yinhloko yomnyango uMnuz Thando Tubane elizoxoxisana nomasipala.
“Umasipala uzwakalise ukuthuka ngalesi sehlakalo. Imeya eyayingaphandle kwezwe ngokomsebenzi kwadingeka ukuthi inqamule uhambo lwayo ukuze izobhekana nalezi zinsolo. Ngihlanganisa umbiko engizowethula kuNgqongqoshe kazwelonke woMnyango wezokuBusa ngokuBambisana ngezinyathelo asezithathile selokhu kuvele lezi zinsolo.” Uthe bathole ukuthi izinsongo zokusatshiswa komsebenzi kamcwaningi mabhuku kuMasipala waseMsunduzi eMgungundlovu bezingelona iqiniso. “Kube nokungaboni ngaso linye ngezinye zezinto phakathi komsebenzi kamasipala nomsebenzi wehhovisi likamcwaningi mabhuku kodwa ngenxa yokuthi abasebenzi bomnyango babekhona bangenelela bachaza. Ngihlanganile nemeya ngalolu daba yathi izobiza zonke izinhlaka ezithintekayo,” kuqhuba uNkk Dube-Ncube. Kwenzeka lokhu nje iPhalamende liphasise umthetho sivivinywa iPublic Audit Amendment Bill, ezonika amandla ihhovisi likamcwaningi mabhuku ukuthi lidlulisele emaphoyiseni uma kukhona inkohlakalo ekusetshenzisweni kwemali emikhandlwini ehlukene. Umcwaningi uzokwazi futhi ukuphoqa izikhulu ukuthi zibuyise imali esetshenziswe ngendlela engafanele.
Umthethosivivinywa uzodluliselwa emkhandlwini wezifundazwe ukuze nawo ushayele isipikili kuwona.
USotswebhu we-ANC uMnuz Jackson Mthembu uthe lo mthethosivivinywa uzosiza ekulweni nenkohlakalo komasipala.
UNkk Dube-Ncube uphinde wadlulise amazwi enduduzo emndenini kaSihlalo weNFP oKhahlamba uMnuz Nkeni Mabaso nesisebenzi somphakathi uMnuz Nkosikhona Maxhakana ababulewe ngempelasonto.