ISadtu nomkhankaso wokulwa nokugcwala kwamakilasi
INYUNYANA yothisha iSadtu isemkhankasweni wokulwa nokugcwala kwamakilasi ezikoleni nokugulisa othisha. Lokhu kuvele emhlanganweni wesigungu esiphezulu senyunyana eGoli.
UNobhala-jikelele uMnuz Mugwena Maluleke uthe kugcwele ezikoleni zasemalokishini nasemakhaya okugulisa othisha. “Ukugcwala kakhulu kwenza othisha bangakwazi ukuhlinzeka ngemfundo esezingeni. Othisha sebeyagula ngoba bafundisa amakilasi agcwele, kwesinye isikhathi kusuke kungekho ngisho nendawo yokunyathela. Balala ezibhedlela balashelwe ukhwantalala.”
Uthe bazolwa ekutheni kube nemfundo eyodwa ngoba ezikoleni zabakwazi ukukhokha okwakungamaModel C zincane izingane emakilasini uma uqhathanisa nezikole zabamnyama emakhaya nasemalokishini.
Ezikoleni eziningi othisha bakhala ngokuthi bafundisa amakilasi agcwele njengoba kwamanye abafundi baba ngaphezulu kuka-50 ikilasi ngalodwa ekubeni ezikoleni ezazingamaModel C abafundi ababi ngaphezulu kuka-35 kwezinye baba ngaphansi ngisho kuka30 ikilasi ngalodwa.
UMaluleke uthe bakhathazekile ngesibalo esikhulayo sothisha abasebenza njengetoho ezifundazweni ezehlukene.
“Isigungu esiphezulu sinqume ukuthi kuqoqwe ulwazi lothisha abayitoho asebehlale izinyanga ezintathu kuya phezulu. Sifuna ukubalwela labo thisha. Sizoyilwa nendaba yokuthi umqashi ahambisane nokuthi uthisha ahlolwe ukuthi uyawazi umsebenzi izinyanga ezintathu kuphela hhayi ukuthi abanye kuze kuphele unyaka bengaholi,” kusho uMaluleke.
UMaluleke ukhale ngophiko lwentsha lwe-ANC obelugxeka indlela okuqhubeka ngayo izingxoxo zabasebenzi bakahulumeni.
“Simangele ukuthi lolu phiko lunesibindi sokuthi luphawule ngezingxoxo zabasebenzi njengoba eminyakeni emithathu lungakaze ludedele lutho olubambekayo oluthinta izingqinamba kwezemfundo okubalwa izindlu zangasese eziyimigodi okuze kwaphonseka umfundi ona-5 washona eBizana, ukugcwala kwamakilasi, ukuhlukunyezwa kwabafundi, ukushaywa kwabafundi nezinye izinto.”