Kuvulwe isikole esavalwa abazali
SEKUBIZWE umhlangano ophuthumayo esikoleni esike sabhekana nenkinga yokungafundi e-Austerville Primary eWentworth.
Kuqalile ukufunda kulesi sikole ngoLwesibili ngemuva kokuthi ngeledlule kuphazamisekile, abazali bezwakalisa ukukhathazeka ngokungakhokhelwa kothisha abaqashwe yisigungu sabazali, izindlu zangasese ezingekho esimeni esifanele okwenza abafundi bagule.
Abazali bamisa ukufunda bekhala ngokuthi umnyango awenzi lutho ngezikhalo zabo.
Umzali okhulume neSolezwe kodwa wangathanda ukudalulwa, uthe inkinga kuthiwa imali ayikho okwenza bangakhokhelwa othisha.
Uthe emhlanganweni obukhona emasontweni ambalwa edlule kukhalwe ngokuthi u-80% wabafundi kabakhokhile ngakho isikole asinayo imali.
Abanye babazali bakhala ngendlela okusebenza ngayo imali njengoba besola inkohlakalo befuna kwenziwe uphenyo ngokusebenza kwezimali kulesi sikole.
“Sekubizwe umhlangano ngoMgqibelo wokuzwakalisa ukungabethembi ubuholi besigungu sabazali. Isigungu sishomene noMnyango wezeMfundo yingakho kunezinkinga. Sikhathazekile ngoba izingane ezilimalayo uma kungafundwa,” kusho umzali.
Kuthiwa abahlanza isikole bayekiswe maphakathi nale nyanga kukhalwa ngendaba yokushoda kwemali.
Amakilasi kuthiwa agcwele abafundi babalelwa ku-50 ekilasini.
Okhulumela uMnyango wezeMfundo esifundazweni, uMnuz Sihle Mlotshwa, unxuse abazali ukuthi uma benezinkinga bangaphazamisi ukufunda nokufundisa.
Uthe umhloli wangenelela kulesi sikole wahlangana nabazali ngezinkinga.
“Sizothola umbiko ogcwele ngokwenzekayo njengoba umhloli ebekhona kanti into ethinta imali idinga isikhathi ukuze iphenywe,” kusho uMlotshwa.