Abayizwa eyezihonga zosomabhizinisi
I-SACP KwaZulu-Natal inxusa uhulumeni wesifundazwe ukuba ungenelele uqede umkhuba odlangayo wosomabhizinisi abayizihonga abafuna ukunikwa amathenda ngenkani.
Esithangamini nabezindaba eThekwini izolo, uNobhala weSACP esifundazweni, uMnuz Themba Mthembu uthe uMkhandlu weTheku nowaseMsunduzi basezinkingeni ngenxa yokuvumela ukulawulwa osomabhizinisi abafuna imisebenzi ngenkani.
UMthembu uthe emhlanganweni wabo kuvele isikhalo mayelana nokuphathwa kukaMasipala weTheku nowaseMsunduzi.
“Umhlangano wethu uvumelane ngokuthi uhulumeni akenzi okwanele ukulungisa isimo kulabo masipala,” kusho uMthembu, wengeza ngokuthi abaneme futhi ngesimo soMnyango wezeMfundo esifundazweni.
Uncome isinyathelo sikaMengameli uMnuz Cyril Ramaphosa sokuthi ajube iSpecial Investigating Unit (SIU) ukuba iphenye uMnyango wezokuThutha esifundazweni.
Uthe bavumelane ngokuthi kumele bahlangane noNdunankulu wesifundazwe noNgqongqoshe abathintekayo ngenhloso yokuqeda lesi sihlava esihlasele isifundazwe ikakhulukazi eThekwini.
“Ukudlondlobala kwalabo somabhizinisi kuzoba nomthelela omubi ekuhanjisweni kwezidingo nakubasebenzi abasemazingeni aphansi. Labo somabhizinisi baqhosha ngokuthi bazwana nosondonzima bosopolitiki,” kusho uMthembu.
Uthe eThekwini bezwa kuthiwa labo somabhizinisi bake baphazamisa isigcawu sokuqondisa ubugwegwe kwesinye isikhulu somkhandlu.
“Siyazi ukuthi kwakungesikho okokuqala ukuthi kwenzeke isigameko esinjalo kodwa uhulumeni wethu kubukeka sengathi awenzi lutho,” kusho uMthembu.
Yize uMthembu engazange abize magama abantu kodwa eKZN kunezinhlangano ezifana noDelangokubona no-Asidle Sonke esezingene emkhankasweni wokumisa izinhlelo zentuthuko ngoba zifuna imisebenzi ngenkani.
Kunezinhlelo eziningi ezimisiwe kubalwa nentuthuko yebhuloho laseNtshangwe lapho kuthiwa amalungu eDelangokubona agasela khona afike afuna umsebenzi ngenkani.
USihlalo weSACP eKZN, uMnuz James Nxumalo, uthe ukusatshiswa kwabacwaningi mabhuku eThekwini kukhombisa ngokusobala ukuthi zinkulu izinkinga.
“Iyishwa futhi iyihlazo le nto eyenzeke eThekwini ukuthi kusatshiswe abacwaningi mabhuku. Ngicabanga ukuthi kuyaqala ukuthi kwenzeke into efana nalena,” kusho uNxumalo.
Mayelana nodaba lomhlaba, uMthembu ukhwele wadlika kubaholi be-ANC wathi badlala umacashelana ngalo.
“Indlela abahudula ngayo izinyawo yenza singabaze ukuthi lolu daba luyoke luxazululwe,” kusho uMthembu.
Ngodaba lwengqungquthela ye-ANC eKZN, uMthembu uthe bona bamile ekutheni ingqungquthela kumele ingahlali kuze kuxazululwe zonke izikhalo ezikhona emagatsheni.
Uthe bafuna kube nokhukhulelangoqo womhlangano wamadlelandawonye lapho kuzobhungwa khona ngezinto ezithinta wona ngaphambi kokuthi kube nengqungquthela.