Kubuyisa ithemba ukuqokwa kukaKolisi njengokaputeni
KUBUYISA ithemba okwenziwe ngumqeqeshi wamaBhokobhoko, uRassie Erasmus, ngokukhetha uSiya Kolisi ukuthi abe ngukaputeni weqembu lesizwe lebhola lombhoxo laseNingizimu Afrika.
UKolisi, ongukaputeni weStormers, uzohola amaBhokobhoko emidlalweni yamaTest azoyidlala ne-England ngoJuni kuleli. Okokuqala emlandweni wombhoxo eMzansi ukuthi kube nokaputeni omnyama ozohola iqembu emidlalweni yamaTest. Phambilini uke waqokwa uChilliboy Ralepele ukuthi ahole amaBhokobhoko ebhekene neBarbarians. Nokho lona kwakungewona umdlalo weTest futhi ukudlala neBarbarians akuthathwa njengento ebaluleke kakhulu. U-Erasmus ubukeka efike nomqondo omuhle nendlela yokucabanga evulekile njengoba eqoke abadlali abawu-20 abamnyama eqenjini lakhe elisekhempini. Lokhu kuyizinkomba zokuthi uzophela umsindo wokukhala ngokuthi abadlali abamnyama abanikwa ithuba kumaBhokobhoko okuyinto osekuliwe nayo iminyaka.
Okuhle ngokuqokwa kukaKolisi ukuthi useneminyaka ewu-26. Lokhu kuchaza ukuthi angaba ngukaputeni ngokusemthethweni isikhathi eside. Vele sekuyisikhathi sokuthi abadlali banikwe ithuba ebholeni lombhoxo ngokwekhono labo, hhayi ngokwebala njengoba bekwenzeka phambilini. Ibhola lombhoxo ngelabo bonke labo abalithandayo nabanekhono lokulidlala ngakho kumele iphele indaba yebala uma kukhulunywa ngalo mdlalo. Bakhona abamhlophe abashaye amakhala ngesinqumo sika-Erasmus sokuqoka uKolisi, ezinkundleni zokuxhumana. Lokhu kukhombisa ukuthi iNingizimu Afrika ayikabi yile nto esiyifunayo ngoba kunabasabona imidlalo ethile njengokumele iphathwe yibona kuphela.
Labo abaphikisana nokuqokwa kukaKolisi kumele bazibuze ukuthi kungani lo mdlali engukaputeni kwiStormers. Ngabe nakhona uqokwe nje kodwa alibonakali ikhono nobuholi bakhe? Abadlali abaningi ababa ngokaputeni emaqenjni esizwe uthola ukuthi basuke benezikhundla ezifanayo emaqenjini abasuke bewadlalela. Isibonelo, uWarren Whiteley, ongukaputeni wamaBhokobhoko osalimele, ungukaputeni kwiLions. Okwenziwe ngu-Erasmus eqoka uKolisi kuyinto eya phambili nebuyisa ithemba ekubambisaneni ebholeni lombhoxo.