Siyathandana asikaze sibonane ubuso nobuso
EZOTHANDO
UMBUZO: Ngingowesifane oneminyaka engu35 osethandane nesoka esilinganayo nalo isikhashana nje. Sesize sihlala ndawonye. Sobabili sinabantwana ngaphandle, ezami zintathu kanti ezakhe zimbili. Inkinga ukuthi akawufuni noma awubone umshado ngoba yena wake washadelwa phambilini kanti mina ngisawubheke ngabovu.
Uthi asikho isidingo sokushada ngoba yena uyangithanda futhi umshado awuzoshintsha lutho phakathi kwethu. Okungixakayo kodwa kuko konke lokho uphansi phezulu namantombazane la ngaphandle. Angazi ngempela ukuthi ngenzenjani ngoba nezingane zami ave zimkhonzile. Okubuhlungu ukuthi sengimbambe izikhathi ezimbalwa engijolela nomuntu wesifazane oyedwa. Ngabe uyoke angishade kodwa ngelinye ilanga? Ukushintsha kona?
Igama ligodliwe, eTongaat Impendulo: Kusobala ukuthi kwakungemnandi emshadweni wakhe wokuqala. Ngakho kungumsebenzi wakho ukuthola ukuthi kungani ngempela afune ukudlalela kude nomshado. Sihloniphe isinqumo sakhe mayelana nomshado ngoba singcono kakhulu kunokuzibona usushade umuntu obengazimisele ukushada kodwa owenzela wena. Ngisho ukungathembeki kwakhe kumanje kukhombisa khona ukuthi akakabi sesimweni sokuhlala nokuthanda umuntu oyedwa ngesikhathi. Emshadweni kuhle ungene usuqedile. Sewazi ukuthi uzimisele ngokuthanda umuntu oyedwa.
Umshado akuyona indawo yokushintsha umuntu kepha umuntu kumele angene esazi ukuthi ufunani. Umbuzo: Nginezinyanga eziyisishiyagalolunye ngithandana nesithandwa sami saseThekwini, mina ngingowaseGoli ngokuhlala. Inkinga ukuthi asikaze sihlangane ubuso nobuso. Sahlangana ezinkundleni zokuxhumana sathandana uthuli. Manje angazi noma uthando olunjengalolu ngingalwethemba yini. Akasebenzi ngakho ngimenzela izinto eziningi ukumsiza.
Nginovalo lokuthi mhlawumbe imizwa yethu ayizozwana mangabe sihlangana ubuso nobuso. Ngenzenjani?
Percy, eKempton Park Impendulo: Akuyona nencane inkinga ukuhlangana nomuntu ngale ndlela futhi nithandane ngokuphelele. Iningi labo lisathokozile namanje abanye bashadile. Okubalulekile ukuthi uthando lwenu ludlulele esigabeni esilandelayo sokuthi nibonane ukuze ubone ukuthi ngabe uthando lwangempela noma cha. Egoli naseThekwini akuhlukene ngaleyo ndlela. Ningabonana ngisho kungathiwa kanye ngenyanga ngoba uthando ludinga ukuthi lukhule, loko kukhula kuzokwenzeka uma ninesikhathi enisichitha ndawonye. Unesiqiniseko esingakanani ukuthi akanaye omunye umuntu empilweni yakhe? Izinto ezibalulekile lezo ekumele uzazi ngomuntu ozimisele ngaye. Isukumele le ndaba. Umbuzo: Ngamaholide kaKhisimusi wonyaka odlule umama wengane yami wayegodukile eyebona umndeni wakhe. Ukuqeda isizungu ngavakashela kwenye yezindawo zobumnandi ezidumile ngasekhaya eMlaza. Ngahlangana nowesifazane sagcina sesiphuza ndawonye. Sagcina sesigoduka ndawonye ukuya emzini wami. Lo wesifazane ngamugcina ngalelo langa ngoba ngangichitha isizungu nje ngaye, hhayi ngoba ngangimthanda.
Emasontweni ambalwa edlule ngibone ngamapoyisa esefika emzini wami ethi lentombazane ingibophela ukuyidlwengula. Kanjani ngoba sasiphuzile sobabili futhi sasivumelene. Inkinga enkulu ukuthi angizange ngimazise umama wengane yami ngalolu daba ngoba ngangazi ukuthi ngeke ngiphinde ngiyibone le ntombazane.
Angazi ngempela ukuthi ngizomtshela kanjani manje udaba lwamaphoyisa. Ngiyazisola nokuthi ngangiyaphi nje kuleya ndawo. Ngiphithene ikhanda.
Thulani, uMlaza Impendulo: Siyazwelana nawe mfowethu. Ukusolelwa ukudlwengula akuyona into encane. Kuzomele ubonise ngayo yonke indlela ukuthi awunacala futhi nanivumelene. Loko kuzothatha isikhathi futhi kuzomele uzitholele ummeli okunguyena ozokuchushisa ngemigudu ekumele uyilandele. Mayelana nomama wengane yakho. Ayikho enye indlela ngaphandle kokuthi uphumele obala kuyena. Yebo siyavuma wenza iphutha kodwa okumele ukwazi ukuthi okwenze ekucasheni kunendlela yokuziveza ngaphandle. Bheka nje manje usukuphi. Sekumele uhambe izinkantolo uzama ukuveza ukuthi umsulwa. Kuyisifundo esikhulu lesi sokuthembeka kulabo esithandana nabo.
Sinethemba lokuthi kuyovela mangabe ngempela nanivumelene nalosisi. Xhumana nathi ku: Facebook: Mo & Phindi Instagram: Mo _Phindi Email: info@moandphindi. com