NjengamaZulu asibe nomnotho wethu sizimele geqe njengesizwe
MHLELI: Isimo esishubile sezepolitiki KwaZulu-Natal ngokugobhoza kwegazi mihla namalanga siyaphoqa ukuba ke siyohlala ngaphansi kwesihlahla ukuze kukhulunywe eyobunye besizwe sakwaZulu.
Miningi imindeni ekhalelwa yikati eziko ngenxa yokuthi amadoda aqothwe ngemikhono yamakati maqede kwasala izintandane.
Isimo sepolitiki yanamuhla sidinga ukuba ke sihlangane njengemihlathi eyazanayo siludingide lolu daba esigcakini maqede siphume nesisombululo esiyosiza amaZulu wonkana.
Iqiniso lithi, ipolitiki isikhombisile ukuthi ayizile ukuzobumba isizwe kodwa izoshayela isipikili sokugcina ukuba isizwe siphelelwe nayilokho esisabambelele kukho. Ngicabanga ukuthi sesifikile isikhathi sokuba izwe nomhlaba wakwaZulu uzimele geqe uphume ngaphansi kweNingizimu Afrika nathi sizibuse njengeSwaziland.
Sesifikile isikhathi sokuba umnotho walesi sizwe ube ngowethu njengesizwe samaZulu ngoba uma singavuki emaqandeni bazosicuphela imigoga kuhambe nalokhu esisabambelele kukho.
Uma singase siyilahle ipolitiki yaseNingizimu Afrika sizakhele eyethu nendlela yomnotho ozozuzisa thina sonke bakwaZulu kuzophela ukubulalelana izikhundla njengoba kwenzeka KwaZulu-Natal engaphansi kweNingizimu Afrika.
Nginesiqiniseko uhulumeni esiyomkhetha ngo-elethu ukuba asiphathele umnotho wesizwe uyosihlomulisa, wakhe namaningi amathuba omsebenzi kulesi sizwe maqede kunciphe nobugebengu njengaseSwaziland.