Izikhalo kubalimi ngowokukhiqiza imbewu
ABALIMI baseMtubatuba abagqumisa izimbewu, bakhala ngomthetho-sivivinywa ovimba ukuthi kudayiselane noma kunanelwane ngazo.
Abalimi bathi azinawo amakhemikhali ngoba abazisebenzisi izibulali zinambuzane namakhemikhali okubulala ukhula. Bakhala ngomthethosivivinywa iPlant Breeders Rights Bill (PBR), ka-2015, osezandleni zeNational Council of Provinces (NCOP). Uma i-NCOP iphasisa iPBR, izoya ephalamende iphasiswe ibe ngumthetho.
I-PBR ivimba abangenayo imvume yokukhiqiza, bakhangise, baphindaphinde, noma bagcine imbewu.
Abakhiqizi bembewu abanemvume ngokwe-PBR banelungelo lokuthi uma bebona omunye umuntu ongenayo imvume ekhiqiza imbewu, bamyise enkantolo.
Ngokwe-PBR umkhiqizi onemvume uvumelekile ukuthatha izimbewu ezikhiqizwa umkhiqizi ongenamvume nokushaqa izitshalo ezitholakale ngembewu yongenamvume.
Otholakale ephula umthetho angahlawulisa noma athole isigwebo esingaze sifinyelele eminyakeni ewu10. UNkk Fakazile Mthethwa owaziwa ngogogo uQho, uthe iPBR ayibabhekeleli abalimi abazikhiqizela ukudla, abangafuni ukusebenzisa imbewu ethengwayo.
“Imbewu yethu siyibeka ngesikhathi sivuna, uma sekushaye isikhathi sokutshala sisebenzisa yona. Ngokwalo mthetho-sivivinywa asibhekelelwanga. Ngokwesintu siyenanelana imbewu kodwa lokhu kusuke kungekona ukwenza ibhizinisi, kulo mthetho-sivivinywa sibona sengathi sizozithola sesiboshwa,” ugogo uQho.
UNkk Mthethwa usho lokhu ngesikhathi izinhlangano zabalimi abazikhiqizela izimbewu futhi abangawasebenzisi amakhemikhali bekhangisa ngezimbewu nezitshalo abazikhiqizayo.
Kube nenkundla yokucobelelana ngolwazi obekuhloswe ngayo ukufundisa umphakathi, nezikhulu zikahulumeni ngomsebenzi wabo.
UNkk Venessa Black wenhlangano engenzi nzuzo ekhuthaza ukuthi imiphakathi izikhiqizele yona ukudla ekudlayo weBio Watch SA, esebenzisana nalaba balimi, uthe bayazi ukuthi iPBR isisesigabeni sokugcina kodwa futhi baphawula ngayo ngesikhathi kusavulelekile.
“Okhukhulela ngoqo bemibhikiso ephikisana nokuthi abantu abazikhiqizela ukudla banikezwe izimbewu ezikhiqizwe elaboratry, sicabanga ukuthi bawenzile umehluko kodwa sifuna ukuzwakalisa ilaka lethu kuze kube sesigabeni sokugcina,” kusho uNkk Black.