Izindondo kulabo abakwezokuvakasha
KUNXUSWA abanamabhizinisi aphathelene nezokuvakasha ukuthi bangenele umqhudelwano wezindondo owaziwa ngeLilizela Tourism Awards. Lo mqhudelwano wasungulwa nguMnyango wezokuVakasha ngokubambisana nabeSouth African Tourism.
Imingenelo iyagcina namhlanje. ITourism KZN ithe isifundazwe sinokuningi esinganikezela ngakho, ngakho ukungenela lo mqhudelwano kuzokwenza isifundazwe sifinyeleliswe ezingeni lesizwe nesomhlaba.
“Ezokuvakasha zidlala indima enkulu emnothweni waKwaZuluNatal, ngezingqungquthela nemicimbi esuke yesekelwe ngezingqalasizinda ezisezingeni. Ingqungquthela yakamuva i-Africa Tourism Indaba iwubufakazi bengqalasizinda yethu esezingeni lomhlaba.”
Iqhuba iTourism KZN ithe inhlosongqangi ngalo mqhudelwano ukubungazwa kwabantu abanamabhizinisi amayelana nezokuvakasha. Selokhu lo mqhudelwano wethulwa ngokusemthethweni ngo-2013, sesandile isibalo semingenelo etholwa ngabagqugquzeli. Ngo-2017 lo mqhudelwano waheha imingenelo engu-1 649, okusho ukuthi isibalo sikhuphuke ngo40% kwesango-2016, okwaba yimingenelo engu-1 122. Ngo2017 yayingu-218 imingenelo yosomabhizinisi baseKZN, uma kuqhathaniswa newu-140 yango2016.
Oyiyisikhulu esiphezulu esibambile kwiTourism KZN, uNkk Phindile Makwakwa, uthe: “Ukwanda kwemingenelo akuzona izinkomba zokukhula kwebhizinisi lethu lezokuvakasha kodwa lisho ukukhula kwethemba lezivakashi zangaphandle kuleli. Agqugquzela abantu ababamba iqhaza kwezokuvakasha ukuba banyuse amasokisi. Uma indawo ibekwa kahle, kwenza sande isibalo sezivakashi eziyivakashelayo.”
Ngemininingwane egcwele ngokungenela, kungavakashelwa ku-//lilizela.co.za/enter.
-NETWORK REPORTER UNkk Fakazile Mthethwa owaziwa ngogogo uQho, uthe iPBR