UNyamande ubalwa nabathenjwe nguNick
KWAGCINA ngoStephen Muzhingi ukuthi umgijmi waseZimbabwe adle umhlanganiso kwiComrades Marathon kanti kulokhu umkhaya wakhe uHatiwande Nyamande unalo ithuba lokujabulisa omakhelwane beNingizimu Afrika ngokukhipha omunye umpetha walo mjaho omkhulukazi noma aphinde abuye negolide.
UNyamande (38) ungomunye wabagijimi abathwelwe ngeqoma yiNedbank Running Club ngaphambi komjaho walo nyaka ongoJuni 10 nozobe usukela eCity Hall eMgungundlovu uyophelela eMoses Mabhida Stadium, eThekwini okuyibanga elingaphezulu kuka-90km.
Ngo-2015 waphuma endaweni yesithathu. Ngo-2016 akenzanga kahle kanti nyakenye ungene endaweni yesibili.
“Uziqeqesha ngokukhulu ukuzinikela. Ngithemba ukuthi uzokwazi ukugijima kahle athole indawo kwabathathu abaphambili,” kusho uNick Bester oyimenenja yabagijimi kwiNedbank Running Club.
“Akusiyena yedwa esimphethe. Baningi abagijimi bethu esibabhekile njengoLudwick Mamabolo, noMike Fokoroni.
Kwabesifazane uBester ethimbeni lakhe uthipha umpetha wango-2016 uCharne Bosman, Gerda Steyn noFikile Mbuthuma ukuthi bathole amagolide.”
Ugcizelele elokuthi ukuqina ngokomqondo ngosuku lomjaho yikhona okuwukhiye ekunqobeni ngaphezu kokuqina ngokomzimba.
Ukuze uNyamande alandele ezinyathelweni zikaMuzhingi owanqoba ngo-2009-2011, kuzomele awanyuse kakhulu amasokisi.
UNyakenye ngemuva kokuhlulwa uBongmusa Mthembu wazisholo ngokwakhe ukuthi akamuhle uma kwehliwa kodwa umandla kakhulu uma kuqwalwa izintaba.
Namarekhodi akhe uma kubhekwe ezansi ayakuvumela lokhu akushoyo njengoba engakaze athole igolide noma isiliva uma kwehliwa.
Phakathi kwabagijimi okuzomele ababeke iso emjahweni, uyena uMthembu oseke wanqoba kwehliwa ngo-2016, uDavid Gatebe, uzakwabo uFokoroni, Mncedisi Mkhize, noClaude Moshiywa.
UMuzhingi (43) osebalwa nezinkunzi zeComrades uthole isiliva nyakenye engena endaweni ka-20.
Wagcina ngo-2011 ngesikhathi enqoba ukuthi abalwe nabathathu abaphambili. Uma ekwazi ukuthi angene kwabayishumi abaphambili, kuzobe kuyigolide lakhe leshumi selokhu aqala ukuyibamba kwiComrades ngo2005.