Uphonsele inselelo abamgxekayo
UNOMPEMPE uVictor Gomes uphonsele inselelo labo abemgxekayo wathi abangene ekilasini lokufundela ukufutha impempe uma bekholwa wukuthi bangenza kangcono.
UGomes, onuka iqaqa kwabaningi ebholeni laseNingizimu Afrika, ukhale wemuka nomklomelo kanompempe ovelele kwiPremier Soccer League (PSL) iReferee of The Season ehlula ozakwabo uVictor Hlungwani noChristopher Harrison. Baningi abahlale bekhala ngezinqumo zikaGomes ikakhulukazi zokubeka amaphenathi abanye abawabona njengangafenele.
Useze waqanjwa namagama. Kukhona amambiza ngoPenaldinho, abanye bambiza ngoMr Penalty. Umqeqeshi weMamelodi Sundowns, uPitso Mosimane, usanda kuphumela obala egxeka uGomes ngokuthi ngisho enze iphutha akaxolisi njengabanye onompempe, wathi usebeke okungenani amaphenathi awu-15 adla amaBrazilians.
UGomes uthe akanandaba nabamgxekayo, inqobo nje uma enza umsebenzi wakhe ngendlela abona ilungile.
“Uma usika utshani emzini wakho, umakhelwane uzokhononda. Kodwa awuyeki, uyaqhubeka. Nami nginjalo, ngiyaqhubeka nokwenza umsebenzi wami ngendlela engiwazi ngayo. Abantu abasigxekayo abeze bajoyine iSafa (South African Football Association), basisize. Onompempe bambalwa. Ngiyabakhuthaza, noma ubani obona ukuthi angaba wunompempe ukuthi aphumele obala, asisize. Kufanele siphephezelise ifulegi laseMzansi. Siyahlonishwa i-Afrika yonke.”
Isizini ka-2017/2018 iveze okuningi ngonompempe. Ababili abanamava – uLwandile Mfiki noPhillip Tinyane – bebengabonwa enkundleni emuva kokwehlulwa yisivivinyo seSafa. Lokhu kushaye kwezwela ngisho kwabaphethe kwazise baphoqekile ukuthi bafake onompempe abasengamakluma ukuze kuqhubeke imidlalo. Owayengunompempe, u-Andile “Ace” Ncobo ukuzwakalisile ukuthi ujabhile ngokwehlulwa yisivivinyo konompempe abebethathwa njengabanye abawumgogodla.
UGomes uthe yize uvalo, inqobo yisibindi konompempe abasakhula.
“Ekugcineni kufanele wenze umsebenzi wakho, uvule umqondo, uzinikele ngakho konke onakho. Singabantu, amaphutha ayenzeka kodwa uma engawushintshi umphumela womdlalo kulungile. Kufanele ungene ensimini wenze umsebenzi wakho. Ngithanda ukuyala bonke onompempe abasakhula ukuthi bangesabi, kufanele bathathe izinqumo ngokubonwa amehlo abo. Anginankinga ngokubizwa ngamagama, labo abagxeki nje. Abantu bayohlala bekhuluma akukhathaleki ukuthi wenza kahle noma wenza kabi. Kodwa kufanele silivikele ibhola sisimele isinqumo esiyiso,” kusho uGomes.