Unqamula inkontileka obegijima kwiChiefs
UYASHIYA kwiKaizer Chiefs uKeegan Buchanan ohlulwe yishumi (unombolo 10) kuleli qembu eliqede isizini lishwiba izandla.
UBuchanan (21) usenenkontileka naMakhosi kodwa imenenja yakhe uPaul Mitchell weSiyavuma Sports Agency, itshele Isolezwe ukuthi uyashiya eNaturena.
Lo mdlali oyibamba enkabeni yenkundla ufike kuleli qembu ethwelwe ngeqoma ukuthi uzogila izimanga.
Ugixabezwe ngonombolo 10 owagqama kusadlala izingwazi ezifana noStanton “Stiga” Fredericks, Isaac “Shakes” Kungwane no-Absolom “Scara” Tindwa.
“Ngeke ahlale kwiChiefs, uyashiya. Okwamanje asikasayini lutho kodwa sisezinhlelweni zokuthi sinqamule inkontileka kwiChiefs. Nginethemba lokuthi okwenzeke kuSiyanda Xulu kuzokwenzeka nakuyena,” kusho uMitchell.
UXulu ushiye iChiefs wajoyina iMaritzburg United afike kuyona wadlala ingcwenga yebhola. Lokhu kuholele ekutheni anikwe ibhande kwiBafana Bafana waphinde waqokwa njengomdlali wasemuva ovelele.
Eminyakeni eyedlule izinto bezibaphika abadlali abafike kwiChiefs banikwa unombolo 10 ngoba kubhekwe lukhulu kubona. Ngaphambi kokuthi leli jezi ligqokwe nguBuchanan belibelethwa nguSiyabonga Nkosi.
Lesi silomo saseMndozo, eNewcastle, asizange sibe nezinsuku ezimnandi kwiChiefs ngoba sike sahhewulwa abalandeli. Sinqobe izicoco ezimbili ze-Absa Premiership eseTelkom Knockout neseNedbank Cup kodwa asizange sigqame njengoba senza ngesikhathi sijoyina iChiefs ngo-2006.
Abanye abadlali abashaye udaka ngeshumi kuMakhosi nguMichael Nkambule, Tony Ilodingwe waseNigeria, Mthokozisi “Diski-Dance” Yende noSongwe Chalwe.
“UBuchanan uzolithola iqembu. Umdlali ofana naye ngeke athwale kanzima ukuthola iqembu elisha. Ukulimala nakho kumphazamisile kwiChiefs,” kusho uMitchell.
IMaritzburg kuvela izindaba zokuthi imfuna uthuli lo mdlali ozakhele igama kwiBloemfontein Celtic ngaphambi kokuthi aye kwiChiefs.