‘Iziminenja zabadlali zijaha imali’
USIHLALO weMaritzburg United, uFarook Kadodia, ugxeka izimenenja zabadlali ngokugijimisa imali phambili nokwenza abadlali bagcogcome emaqenjini noma singekho isidingo.
UKadodia ubekhuluma emuva kokuvela kwezindaba zokuthi iqembu lizoqala isizini ka-2018/2019 ngaphandle kukakaputeni uBevan Fransman onqabile ukusayina inkontileka entsha neTeam of Choice. UFransman ukhonjwa kwiBidvest Wits nakwiCape Town City.
Ngaphambi kokuqala kwesizini ka-2017/2018 iTeam of Choice ishiywe nguKurt Lentjies oseyibamba kwiChippa United. Naye akavumulenanga neqembu ngemali abekade eseyifuna.
“Ngiphoxekile ngokulahlekelwa nguBevan. Kodwa iqiniso lithi izimenenja zabadlali ziyabalawula. Uma umdlali ephelelwa yinkontileka izimenenja zenza imali enkulu. Kwenzeke lokho nalapha. Ngicabanga ukuthi uBevan ngokwakhe ubengathanda ukuhlala kodwa imenenja yakhe ibilokhu imfesela kwamanye amaqembu. Njengoba engasenaqembu uzojoyina iqembu elizofika nemali enkulu,” kusho uKadodia.
“Ngizamile ukumncenga uBevan ukuthi ahlale enye isizini kodwa bengingeke ngimvalele ekhoneni. Ngimfisela konke okuhle. Wenze umsebenzi oncomekayo kumasizini amabili awadlalile kwiMaritzburg. Bengingathanda ukumgcina enye isizini kodwa kade sekungaphezu kwamandla ami.” ITeam of Choice, ehlulwe yiFree State Stars kowamanqamu weNedbank Cup, igoduke inyinyitheka yizindondo emcimbini wePremier Soccer League (PSL) wokuklomelisa abadlali eSandton Convention Centre, eGauteng, ngoLwesibili ebusuku. USiyanda Xulu waKwaMashu uwine umklomelo l-Absa Premiership Defender of The Season ehlula uFransman no-Innocent Maela we-Orlando Pirates.
ULebohang Maboe ugoduke nomklomelo iNedbank Cup Player of The Tournament neNedbank Cup Promising Player of The Tournament. USiphesihle Ndlovu uwine i-Absa Premiership Young Player of The Season neMidfielder of The Season.
ITeam of Choice, emataniswa nabadlali abaningi okukhona kubona uFagrie Lakay noDean Furman beSuperSport United, ivuselele inkontileka yomqeqeshi uFadlu Davids.
“Ngijabule kakhulu ngokuthi sibuye nezindondo eziyisihlanu. Ngicabanga ukuthi kungumphumela womfutho esiwufake ebholeni eminyakeni edlule nangendlela iqembu elidlale ngayo kule sizini. Kuhle kubadlali abadlale kwiPSL isizini yokuqala egcwele ukuthola le miklomelo. Kubalandeli beMaritzburg lokhu kuyinto enkulu,” kusho uKadodia.
“Abantu bazolindela okukhulu ngesizini ezayo. Sizibeke thina lapho. Wonke amasizini ahlukile. Kufanele senze isiqiniseko sokuthi abadlali bahlangene njengoba kade kwenzekile kule sizini ukuze sithole imiphumela. Ukugcina abadlali nomqeqeshi kuzosiza ekutheni sithole okwedlulele ngesizini ezayo. Asinazo izinhlelo zokudayisa abadlali. Ngicabanga ukuthi kufanele bahlale enye isizini, sibone ukuthi kwenzekani.”