Izingxogxo ngoMhlongo nekhaya elisha kwiCT City
KUCACISWA ngekusasa likanozinti we-Orlando Pirates, uBrighton Mhlongo ofunwa uthuli yiCape Town City.
UMike Makaab weProSport International okuyinkampani ephethe izindaba zikaMhlongo, uvule isifuba ngamahlebezi akhomba lo nozinti kwiCity.
Kule sizini esanda kusongwa, uMhlongo, ubebolekiswe kwiChippa United kwaze kwaphela isizini. IPirates imatasa nezinhlelo zokuqinisa iqembu layo. Leli qembu kulindeleke ukuthi maduze limemezele uBrilliant Khuzwayo, obekwiKaizer Chiefs, njengonozinti omusha.
Uzobanga indawo noSiyabonga Mpontshane noJackson Mabokgwane kwazise eZimnyama zingase zimfake endalini uWayne Sandilands. Lokhu kuyakucacisa ukuthi uMhlongo akasenayo indawo kwiPirates.
“I-Pirates iyaxoxa neCape Town City ngodaba lukaMhlongo. Amaqembu kumele avumelane bese sibhunga ngezidingo zomdlali. Amaqembu angavumelana kodwa konke kuncike ekutheni umdlali weneme yini yena,” kusho uMakaab.
UMhlongo unobudlelwano obuhle nomqeqeshi weCity, uBenni McCarthy. Badlale ndawonye ngesikhathi uMcCarthy esayibamba kwiPirates. Ngaleso sikhathi uMhlongo wayesemncane futhi eyibambe endaweni yesithathu ohlwini lonozinti abahamba phambili.
USenzo Meyiwa noMoeneeb Josephs babegiya ezintini ngaleso sikhathi. Kwakuthi njalo uma iPirates isiqeda ukuzicija, uMcCarthy noMhlongo basale. UMcCarthy wayesuke efuna ukuzicija ekutheni abe nguchwepheshe wokushaya amafree kick.
Njengamanje iCity ibophele uSage Stephens okuphele isizini ebusa ezintini no-Shuaib Walters. Leli qembu like lamataniswa noKhuzwayo kodwa lagcina lihoxile.
UMhlongo ujoyine iChilli Boys ngoJanuwari. Kuleli qembu ufike wadlala imidlalo eyisishiyagalombili. Ubebanga ijezi nonozinti waseNigeria uDaniel Akpeyi osohlwini lwabadlali beSuper Eagles abangase baye kwiNdebe yoMhlaba.