Bekubheda uhlelo kulokhu emcimbini wokuklomelisa abadlali bePSL
UYAZI ngike ngajula ngesikhathi ngibuka umcimbi wePremier Soccer League (PSL) wokuklomelisa abadlali abashaye into ecokeme ngesizini yebhola esanda kusongwa.
Umcimbi waminyaka yonke ubuseSandton Convention Centre, eGoli, ngoLwesibili ebusuku. Okwenze ukuthi ngizithole ngijulile esikhundleni sokubeka umqondo kulokhu obekwenzeka kwithelevishini, isicobecobe esingifikele kuqhubeka umcimbi. Isicobecobe besihambisana nalokhu abakubiza ngokubhoreka. Namanje ngisazibuza ukuthi yini ebishoda kuwona ngoba ubuphethwe abethuli bezinhlelo abaziwayo nabahlonishwayo kwithelevishini, obekukhona kubona uRobert Marawa, Carol Manana noThomas Mlambo. Kodwa ngizozama ukuqagela ukuthi yini eyenze ngangayizwa kahle indaba yawo.
Mhlawumbe kube wukuthi bengizibuza ukuthi kungani kumele umdlali oshaye amagoli awu-11 isizini yonke anikwe umklomelo. Ngike ngabhala ngokungenami kwami ngokuklomelisa ukugejwa kwamagoli kuyona le ngosi. Ngiyajabula ngoba nenkakha, uMike Mangena, ihambe emazwini ami igxeka le nto yokuthi abagadli bethu bashumpuza isizini yonke bese kuba nothola amagoli awu-11 kuthiwe kumele anikwe umklomelo. Ngethemba ukuthi iPSL izoke iyifakele izibuko le ndaba bese ithatha isinqumo okuyisona. Ngokwami umgadli ohluleka ukushaya amagoli okungenani awu-15 emidlalweni ewu30 yeligi akumele aklonyeliswe.
Ake ngizame futhi ukucabanga ukuthi konje yini eyenze ngaze ngozela phambi kwethelevishini kuqhubeka lo mcimbi wePSL ngoLwesibili ebusuku. Kungenzeka ukuthi sengijwayele ukuthi umcimbi uba ngeSonto ebusuku manje oLwesibili luthande ukungejwayeleki. Nangonyaka odlule ngethuka nje lo mcimbi ungoMsombuluko okuyinto engajwayelekile. Angazi ukuthi sithathwe kanjani isinqumo sokuthi ube phakathi nesonto ngoba kuba ngcono uma ungempelasonto. Maningi amathuba okuthi ababukeli abaningi bakhethe ukungawubuki umcimbi baziqhubekele nezinhlelo zabo abajwayele ukuzibuka phakathi nezinsuku. Nokho thina esibhala ngonobhutshuzwayo kuphoqelekile ukuthi sibuke.Mhlawumbe nakho lokhu kumele ikubheke iPSL ngokuzayo.
Ake ngiphinde futhi “ngiziphenye” ngaphakathi ukuthi ngabe kungani ngivele ngezwa kuthi angizibukele imidlalo emidala ebidlala kwezinye iziteshi ngesikhathi kunomcimbi okufanele ngabe asiwasusi amehlo kuwona uma ukwithelevishini. Mhlawumbe kube ukudlala ngokulingana kakhulu kwamaqembu ngesizini esanda kusongwa. Cha bese kunesicefe impela ukubuka imidlalo ebiphela lingekho iqembu elihambe namaphuzu amathathu. Lokhu kwenze yagcina isibhora kwayona isizini okungenzeka ukuthi kube nomthelela ekutheni nalo mcimbi wokuklomelisa abadlali ugcine unduvanduva.
Ngiyazi ukuthi akulona iphutha lePSL leli kodwa kukhona lapho inesandla khona nayo inganakile. Uma isaqhubeka nokuklomelisa umdlali “ogeje kangcono” isizini yonke sisazoqhubeka nokubuka imidlalo ebhorayo ephela kungu 0-0. Uyazi kwi-Absa Premiership ngesizini edlule kuke kwaba nempelasonto lapho kwawina i-Orlando Pirates kuphela, amanye amaqembu adlala ngokulingana wonke. Yinto enjani nje ukuthi emidlalweni eyisishiyagalombili yonke kube newini eyodwa kuphela? Ngethemba ukuthi ngesizini ezayo sizoke sibone ibhola elingcono ukuze nomcimbi wokuklomelisa abadlali sikulangazelele ukufika kwawo.
Uyazi umcimbi wokuklomelisa abadlali bePSL ngiwuthande ngento eyodwa nje, ukugiya kwabadlali beqembu laKwaZulu-Natal, iMaritzburg United. Kube yinto enhle ukuthola imiklomelo kukaSiphesihle Ndlovu, othole emibili, Lebohang Maboe, naye othole emibili, noSiyanda Xulu.
Ukubuya nemiklomelo emihlanu kwabadlali beTeam of Choice kungenze ngathi ukuphaphama kancane ngoLwesibili ebusuku. Angingabazi ukuthi abaphathi baleli qembu laseMphithi bathobeke amanxeba ngemuva kokwehluleka ukuwina iNedbank Cup ehambe neFree State Stars. Ngiyethemba izoqhubeka lapho igcine khona nangesizini ezayo iTeam of Choice.
Sengiphetha ngike ngazibuza ukuthi iphambane kanjani konje imiklomelo enikwe abashaye into ecokeme ngesizini edlule. Ngibone uSiphelele Magubane weLamontville Golden Arrows, obewine i-Absa-lutely Awesome Goal of the Season, enikwa okubhalwe ukuthi Coach of the Season. Kuthe kusenjalo ngabona uXulu weMaritzburg ephethe iMidfielder of the Season esikhundleni seDefender of the Season.
Sengiyabona ukuthi yini eyenze ngaba nesibhocobhoco. Ukuthi bezingahambi nyengaminyaka yonke izinto emcimbini wePSL. Ekupheleni kwesizini ezayo kungahle sibone okungcono kunokwangoLwesibili.